Dem erwirding geystleichen unserm genadigen herrn abbt Hannsen zu Lambach enbieten wir ich Ulreich Ekchmair burger zu Wels, ich Jacob sein prueder, ich Marigret zu den Graven ir swester, ich Kathrey die Chellermayrin ir swester, ich Elsspet die Dornerin ir swester, Agnes die Wedosterin, ich Hanns zu Hag anstat meiner chinder, die irer swester chinder sind, unser willig dinst von wegen des guecz genant in der Lankchwis, das uns anerstariben ist von unserm vatter und mueter saligen, darumb sich unser prueder Hanns Mair zu Utental mit uns frewntlich gericht hat und umb unser eribschafft daran genueg getan hat. Dieselb unser eribschafft daran geben wir ewrn gnad auf mit dem offen brieff, und pitten ewr wirdichait umb ewr sigel unserm prueder Hannsen das guet damit zu bestatten und zu leyhen yem und sein erben iren frum damit zu schaffen, das ist unser aller guetleicher will. Zu urchunt des offen brieffs mit des erbern Wolffkangen des Paltinger, ainer des rates zu Wels, aufgedrukchten sigill, yem und sein eriben an schaden, den wir mit vleizz darumb gepeten haben, und uns darunder verpinten mit unsern trewn stet zu haben und geschriben stet an dem offen brieff. Geben am phincztag nach dem heyling phyngsttag anno xx nono.