Gregorius Dei gratia episcopus Cephaludensis, dilecto in Christo Johanni Dachsperger, abbati monasterii Lambacensis ordinis sancti Benedicti Pataviensis diocesis, salutem in Domino. Ut anime tue salubrius consulatur, auctoritate domini pape, cuius penitentiarie in absentia reverendi in Christo patris, domini Jordani miseratione divina episcopi Albanensis, maioris dicti domini pape penitentiarii curam ad presens regimus, devotioni tue concedimus, quatenus liceat tibi ydoneum et discretum presbyterum in confessorem eligere, qui super peccatis, que sibi confiteberis, nisi talia sint, propter que merito sit sedes apostolica consulenda, auctoritate predicta tibi provideat de absolutionis debite beneficio et penitentia salutari hinc ad quinquenium, quotiens fuerit oportunum. Vota vero peregrinationis et abstinentie, si qua emisisti, que commode servare non potes, ultramarino, beatorum Petri et Pauli atque Jacobi apostolorum votis dumtaxat exceptis, commutet tibi hac vice idem confessor in alia opera pietatis. Dat. Rome apud sanctos apostolos sub sigillo dicti maioris penitentiarii, vi kalendas octobris, pontificatus domini Martini pape v anno nono.