Dem erwirdigen geistleichen herren hern Hannsen abbt ze Lambach enbieten wir ich Nikla, Ulleich und Angnes, Fridreichs von Rawswang saligen chinder, und ich Chunrat, der benanten Angnesen sun, unser willig dinst. Wir haben von ewren gnadn und ewren gotzhaws ain erbtail an dem gut ze Rawswang, gelegen in Gewoltzchiricher pharr, dieselben unsrew rechten sentten wir ewren gnaden auf und bitten ewr gnad, ir wellet dieselben rechten geruchen ze verleichen und ze bestatten Jacobn ze Entarn und Thoman dem Mair ze Rauswang ze rechtem kawff mit ewrem brif, das ist unser aller gutleich will und vleizzig pet, und sult ir und ewr gotzhaws des von uns und unsern erben allweg unengolten und an schaden beleiben. Mit urchund des brifs, versigelt mit des erwern weisen Lienharten des Jorger, diezeit phleger ze Wolfsekk aufgedrukchten insigel, den wir all und anstat aller unser erbn mit vleizz darumb gebeten haben, im und seinen erbn an schaden, darunder wir uns all und unser erbn, als wir oben mit namen verschriben sein, verpinden mit unsern trewn in aydes weis alles das stet ze haben, das der gegenwurtig brif innehalt. Datum dominica Letare anno etc. xxiiiio.