Dem erwirdigen geistleichen herren hern Jacobn abt ze Lambach enpieten wyr Mert Chrotentaler, Anna sein swester, des Jorigen Nagel ze Sebalhen hawsfraw, unser willig dinst. Gnadiger herr, als unser vater Wernhart Freynperger saliger von ewrn gnaden gehabt hat ein halbe wis, genant dy Furtwys, und dy halb peunt daselbs gelegen pey dem Gruenpach in Welser pharr, und dy unser rechts vaterleich erb ist, von eurn gnaden und ewrm gotzhaws, und dy in saczweys in Hainrich Sturczleins des eltarns gewalt chomen ist nach ausweysung seiner brieve, dy er von ew daruber hat, lassen wyr ewr gnad wissen, daz wir dyselbig halb wys und halb peunt dem vorbenanten Sturczlein, Barbara seiner hawsfrawn und irn paiden erben verchauft und ze kauffen geben haben, darumb wyr ycz mit dem gegenwurtigen brieve dy vorbenant halb wys und halb peunt aufgeben, und pitten ewr wyrdigkayt, ir wellet dem benanten Hainrich, seiner hawsfraw und irn erben verleichen und pesteten mit ewrm sigel, darunder wir uns und unser erben verpinden. Und wann ewr gnad daz getan hat, so sag wyr und unser erben ewr gnad des vorbenanten erbe ledig. Besigelt mit der erben weysen Hannses des Wolgmuts liechtmaister der pharr ze Wels, und Ulreichs des Aycher, paid des rats der stat daselbs aufgedrukchten insigel, dy sy durch unser vleyssig pet auf den brief gedrukcht haben, in und irn erben an schaden, der geben ist am nachsten erichtag nach unser frawntag concepcionis anno etc. in dem ainsundzwainczigistem jar.