Dem erwirdigen geystleichen herren hern Jacoben abbt zu Lambach meinem genedigen herren enpeut ich Hans Lerbuchler mein willigen undertenigen dinst. Ich las ewer genad wissen, das ich mein gutt, genant czu Posen Roch, da yczund der Chingsor aufsiczt, und das gelegen ist in Rewthamer pharr, das ich vor von ewren genaden und des goczhaus zu lehen gehabt hab, di selben lehenschaft gib ich ewren genaden also auf und pitt ewr genad, das ier das also in saczesweys verleich Ulreichen dem Umger, purger zu Gmunden, und so ir das getan habt, so sag ich euch der obgenanten lehenschaft ledig und las mit urchunt des briefs, versigelt mit meines lieben pruder Merten des Freyn aufgedrukchten insigel, der das auf den brief gedrukcht hat durich meiner fleissigen pett willen, ym und seinen eriben an schaden, darunder ich mich obgenanter Hans der Lerbuchler verpint mit meinem trewn alles das stet zu haben, das an dem prieff oben geschriben stet, wan ich mein insigel dieczeit pey mir nicht gehabt hab. Der brieff ist geben nach Christi gepurd virczehenhundert jar und darnach in dem newnczehenten jar an sand Peters und an sand Paulstag der heiligen zwelifpoten.