Dem erwirdigen geistleychen hern hern Jacoben abbt ze Lambach empewt ich Elspet, Chunraten von Niderhardaren saligen tochter, mein willig dinst. Genediger herr, ich hab mit willen meins elichen mannes Thomleins von Dyckach allen meinen eribtail und rechten, so ich gehabt hab an der halben hub ze Niderhardaren gelegen in Newnkircher pharr und eribrecht ist von ewern gotshaws ze kawffen geben Hannslein Hoffman von Aspating, seiner hausfrawn und iren bayden erben und pitt ewr gnad, ir leychet in meinen benanten eribtail, das ist mein guttleich will und aller meiner erben, und tut in daruber stat ze rechten kauff, des schult ir und ewer gotshaws von mir und von meinen erben allweg ungelten sein und an zwspruch. Mitt urkund des brieffs, den ich darumb gib, versigelt mit des erbern weysen Hainrichen des Enickleins aufgedruckten insigl, den ich fur mich und fur all mein erben mit fleyss darumb peten hab, im und allen seinen erben an schade. Geben nach Christi gepurd im newnczehenten jar nach virczehenhunndert jaren am sambstag nach dem prehentag etc.