Wir Ulrich von Gotes gnaden abpt ze Lambach und der gmayne convent daselb wir verjehen offentlich mit dem brief, daz wir mit wolverdachtem mut und mit veraintem rat verliechen haben Ulreichen dem Cherbekken und Elzpetten seiner hausfrawen Syfriden von Chrotendorf und Anne seiner hausfrawen und allen iren erben daz gut im Sultzpach gelegen an der wiezz zu rechtem eribrecht mit der bescheiden, daz sie unserm goteshaus jaerleich darvon dienen schullen fümtzig new wyener pfenning an unser vrawentag zu der dienstzeit und fumf pfenning zu der vogtsteur und sway henner au alle widerred und vertzihent. Darüber geben wir in den brief versigilten mit unsern anhangunden insigiln, der geben ist nach Christi geburd dreytzen hundert jar und darnach in dem eins und sybentzigistem jar an dem heiligen weynacht tag.

Source Fulltext: OÖUB 8 (Wien 1883) S. 558, Nr. 561