Ich Fridreich von Maydratz und mein hawsfrawe wir verjehen, daz wir ze chauffen haben geben unser gu^et an dem Pru^enne genant, da zden zeiten Ott der Mitter auf gesezzen ist in Syerdnicher pharre gelegen daz lehen ist von unserm genedigen herren hertzog Ru^edolfen von Osterreich, unserm swager Ortolfen dem Pewzzlein und seiner hawsfrawn und allen seinen . . . erben, umb viertzig phunt wyenner phenning der sew uns gantz und gar gericht und gewert habent also beschaidenleich, daz wir noch alle unser erben hintz dem selben gu^et nimmermer dhain ansprach schullen haben. Daz die red furbas sta^et und unverchert beleib, daruber gib ich Fridreich von Maydratz Ortolfen dem Pewzzlein und allen seinen erben den prief fu^er mich und alle mein erben zu^e einem waren urchunde der warhait versigelten mit meinem anhangunden insigel, und zu^e einer gu^eten getzewgnusse mit des erbern Hainreichs dez Prewhaven anhangunden insigel. Der prief ist geben nach Christi gepurde uber drewtzehen hundert jar darnach in dem fumf und sechtzgisten jar an dem sunnabent tag.

Source Fulltext: OÖUB 8 (Wien 1883) S. 238f., Nr. 236