Ich Jo^erig, der Tewerbanger swester sun purger ze Steyr, vnd mein hausfraw vnd mit sampt vns vnser erben vergehen vnd tu^en chunt mit dem offen prief vor allen lewten gegenwu^ertigen vnd chunftigen vmb die hu^eb, die, die Chochhu^eb genant ist ze Waitarn, gelegen in Si^erdnicher pharre, die vns worden ist von vnserm lieben frewnt seligen. Weinmarn dem Tewrbanger. die selben hu^eb vns der Erwirdig geistleich herre, Abppt Mertten von Chremsmunster verlihen hat, wand, si von im vnd seinem Gotshaws lehen ist, Also beschaidenleich, daz wir vnd vnser erben vnd alle vnser nachcho^emen im vnd seinem Conuentt gen Chremsmünster aller iar ierleich. da von raihen vnd geben sullen, an sand Merten tag, ain halb phunt wienner phenning vnd nicht mer, dieselben phenning wir seinen amptlewten ierleichen an sand merten tag vnuerczogenleich raihen sullen. Ta^eten wir dez nicht. vnd daz versaezzen. daz wir in, wir oder vnser erben vnd nachcho^emen, die dieselben Hu^eb denne inne habent, derselben stewer, dez halben phunt phennings an dem vorgenanten, sand Merten tag nicht ga^eben, so sullent si in den nachsten vierczehen tagen, dar nach nach sand Merten tag, vollen gewalt haben, auf dem selben gu^et vmb die selben stewr, daz halb phunt phenning, ze phenden als vil da von si der selben stewer gancz vnd gar vo^ellichleich becho^emen mugen mit vns vnd vnser erben vnd nach cho^emen, die die selben Hu^eb inne habent gu^etleichem willen vnd wort, an alle irrung vnd wider rede. Daz die rede furbas sta^et vnd vnuerchert beleib, dar vber gib Ich obgenanter Jo^erig dez Tewrbanger swester sun, dem obgenanten Gotshaws ze Chremsmunster vnd seinen phlegern den prief ze ainem sichtigen waren vrchunde der warhait versigilten vnd besta^etigten mit der erbern, Eberharts des Mubanger (!) zden zeiten Statrichter ze Steyr, mit Thomans dez Haiden zden zeiten Richter ze Chremsmunster anhangunden Jnsigeln die ich dez vleizzich gepeten han, Daz si der sache mit iren Jnsigiln geczewgen sind, in an schaden, vnd verpint mich auch obgenanter Jörig mit sampt mein erben vnder iren Jnsigiln alles daz an dem prief geschriben stet, staet ze halten mit vnsern trewn an geua^erde, wand ich die zeit aigen Jnsigils nicht gehabt han. Geben nach Christi gepurdt, Drewczehen hundert iar dar nach in dem Newn vnd Sibenczgisten iar, am freytag in der ersten vastwochen.

Source Fulltext: OÖUB 9 (Wien 1906) S. 588-589