Wir Hainreich von Gots gnaden abpt ze Chremsmunster verjehen, . . . daz wir . . . mit gunst und willen unsers erbern convents verlihen haben ze rechtem erbrecht den hof datz Epping gelegen in Chemnater pharre, mit allen den rechten eren und nutzen und darzu^e geho^ert versu^echt und unversu^echt, dem erbern manne Chunrad dem Pogner auf dem Du^ern ze Steyr und allen seinen erben und nachcho^emen also mit der beschaiden, das sew uns aller jar jerleich davon raihen und dienen schullen an sand Niclas tag ze rechtem dienst dreyzzig wy^enner phenning ze dienst und dreizzig wy^enner phenning ze stewer und ain vogthu^en und nicht mer, und schullen auch alle die recht leiden und dulden die von alter von dem hof ze Epping in unsers gotshaus gericht geho^erent. wa^er aber das sew den vorgenanten hof ze Epping indert verchauffen oder versetzen wolten von swelihen sachen das wa^er, das schullen sew tu^en geng lewten den wir und unser nachchomen gerne leihen und auch unvertzigen unsers gotshaus rechten. Wa^er auch das sew uns den egenanten dienst und stewer ze sand Niclastag versaezzen und nicht gaeben als vorbenant ist, so haben wir vollen gewalt an dem nachsten tag darnach darumb ze phenden auf dem obgenanten hof mit iren gu^etleichem willen an alles recht. Das die red furbas sta^et und unverchert beleib, daruber geben wir obgenanter abpt Hainreich Chunraden dem Pogner und seinen erben den prief zu^e einem waren urchunde der warhait versigelten mit unserm anhangunden insigil, und zu^e einer gu^eten getzeugnu^ezze mit unsers richter Ernstens den Ottztorffer anhangunden insigil. Geben nach Christi gepu^erde uber drewtzehen hundert jar darnach in dem siben und sechtzgisten jar an sand Marie Magdalene abent.

Source Fulltext: OÖUB 8 (Wien 1883) S. 330f., Nr. 338