Wir Leupold von Gotz genaden bischof ze Babenbergk tun kund mit disem brief, das wir Got uud unser fraun und sand Agapiti ze ern dem erwirdigen abt Ernsten und den geistlichen herrn des convents des klosters ze Krembsmunster in Passauer bistumb gelegen die genad gethan haben, das di gu^etter dy gelegen sind im Gerstenthal, di weilert uns und unserm gotzhaus lehen sind gewesen und di dasselb kloster fur aigen gekauft het, das ist der hof ze Sebach und zway gutter am wald darauf Haintzel und Jansel ist gesessen, und di mul an der Pirsink darauf Hainreich sitzt, und ain gut auf der Stikel darauf Jans sitzt, und das guet an der Puechen darauf Berichtold sitzt furbas ewiklich von uns und unserm gotshaus sollen geuigen sein dem vorgenanten abt und convent des klosters ze Chrembsmunster und sullen auch dieselbigen gut ledig und und los sein der hundert cha^es gult und aller vordrung di wir oder unser gotzhaus oder darumb gehabt haben oder gehaben mochten, an das wir mit namen ausnemen unser und unsers gotzhaus vogtey und vogtrecht die wir von allter darauf und davon genadiklich haben, das wir die und unser gotzhaus darauf und davon gena^ediklich haben und nemen sullen und nemen mugen als von allter her ist komen, und sullen auch sich di vorgenanten gu^etter an iren alten rechten wol genugen lassen und furbas nicht vergreyfen uns und den unsern ze schaden an aller geverd, sy mugen auch di vorgenanten gu^etter stifften und storn und iren frumen damit schaffen wie sy gut dunket an all unser irrung als auch von allter her ist komen, und umb di vorgenanten taiding haben sy uns und unserm gotzhaus ytzund geben ain und virtzig phunt wienner phenningen darumb wir ander gult und gut fu^er die vorgenanten chas gult unserm gotzhaus kaufen wellen und kaufen sullen. Ze urkund der vorbeschriben ta^eding geben wir disen brief mit unserm heimlichen insigel dem secret offenlich versigelt das daran hanget, der geben ist ze Wolfsperch nach Kristi geburd dreuzehen hundert jar und in dem acht und fumfzigisten jar am nachsten tag nach sand Jacobstag.

Source Fulltext: OÖUB 7 (Wien 1876) S. 586f., Nr. 577