Ich Jans der Vreysinger ze den zeiten des gotzhaus ze Neunburch amptman vergich und tu^en chund mit disem brief allen lauten, daz fu^er mich cho^em in einem etayding, da ich an dem rechten saz Ru^eger Frumman und vrogt an seiner herren stat von Chremsmunster mit einem brief, der in sagt ain phunt phenning geltes von einer rachen weingarten, di gelegen ist ander vinstergazzen pei Dytmarn dem Druzel, der ich perchmaister pin, und vrogt als lang dar auf um der herren versetzen dienst und um di zwyspild dar auf ze rechter zeit und tegen alz recht ist alz lang daz in geviel, man solt den weingarten schatzen, da ward der weingart geschatzt von erbern lauten, di sagten, daz vor recht pei irem ayd daz der weingart mit pau mit all nicht teuer wer dann der dienst und di zwyspild di seu dar auf behabt hieten, da ward gevrogt, waz recht wer, da geviel in daz mit vrog und mit u^ertail seyd der weingart nicht teuer wer dann daz purchrecht und di zwyspild und di dar auf behabt wem ich solt seu des weingarten gewaltig machen und an di gewer setzen ze verchaufen ze versetzen und geben swem seu wellent alz in daz fu^egunt ist und solt in des einen behab prief geben alz recht wer, und daz hab ich allez getan alz iz in mit vrog und mit u^ertail gevallen ist, und daz der vorgenant Ru^eger seinen herren von Chremsmunster den vorgenanten weingarten vor mir in dem rechten etayding ze gegen dem rat und den genanten und andern erbern lauten mit no^et tayding mit vrog und mit u^ertail und mit rechtem recht in ir gewalt pracht hab ze verchaufen ze versetzen und allen iren frum damit ze schaffen, des gib ich in den herren von Chremsmunster disen brief ze einem wo^ern gezeug diser sache versygelten mit meinem insygel, des ist auch gezeug mit seinem insygel der erber man Hainreich der Du^err, der pei dem rechten gesezzen ist und di selben zeit des rats einer gewesen ist. Der brief ist geben nach Christ gepuerd dreuzechen hundert jar dar nach in dem fumfzygistem des nasten mytichens nach unser Vroun tag ze der Schydung.

Source Fulltext: OÖUB 7 (Wien 1876) S. 196f., Nr. 195