Ich Hainrich von Alharting vergih Offenbar mit disem Prief vnd tůn chunt allen den, di in lesent oder ho^erent lesen, Daz ich den Hof ze Tew^erwang, den Her O^etaker von Egenberg in rechter lehens gewer sein Chinden lazzen hat, den selben Chinden han ich verchauft den selben Hof vmb zwai und dreizich Pfunt alter wyenner Pfenning dem Erbern Herren Abt Friderich ze Chremsmunster und seim Gotshaus, da er lehen von ist mit alle den und dar zu geho^ert wie iz genant sei. Vnd sol auch des Chaufs ir Gewer sein gegen allen den, di hintz dem Hof mit recht icht ze sprechen habent swaz si flu^estig mit dem recht an dem Hof und waz dar zu geho^ert wu^erten, daz sullen seu haben auf aller meiner hab, di ich in dem Land han. Wenne auer Her Ortolf der zendel meinis Herren Hofmaister von Pazzaw oder wer Egenperg, di Chind und ir Gůt inne hat, dem vorgenant Herren Abt Friderich und seim Gotshaus ze Chremsmunster ein Staetigung über den Hof tůnt als des Lants recht ist in Osterrich, so ist mein Prief mit allen gelu^ebden ledig. Vnd daz in di wandlung staet und unverchert beleib; gib ich in disen offen Prief versigelt mit meim anhangundem Insigel, Der geben ist, du von Christ geburd dergangen waren Dreuzehen Hundert Jar dar nach in dem sechs und Dreizkistem Jar, Dez naechsten Suntags vor dem Vasschanch.

Source Fulltext: OÖUB 6 (Wien 1872) S. 199, Nr. 193