Ich Herrant der Aygner mit sampt meinen erben verich und tu^en chunt allen, di disen prief ansehent oder ho^eren lesen, daz mir mein genediger Herr Apt Fridrich von Chremsmunster verlihen hat ean Zehent auf trin Hewsern ze Prunn gantz und auf zwain ze Jendeld auch gantz in Chemnater pfarr zu einem erbrecht mit so getaner beschaidenhait, daz ich im und seinem Gotshaus alle iar ierleich an sand Nyclas tag sechzig phenning wienner munzz dienen schol und verpint mich auch, daz ich oder mein erben alles das tulden und leiden schullen, es sei mit Stewer oder mit anderlai vadrung, di ein ander man dult und leit, der von dem gotshaus als tew^e hat. Swo ich oder mein erben da saumig an weren, da schol mein herr oder sein Amptleut auf dem vorgenanten zehent oder auf ander meiner hab, di ich von dem gotshaus han, mit meinem und meiner erben gutleichen willen und wart vu^er pfenten. Daz dew red stet und unverchert peleib, gib ich meinem hern Apt Fridrich und seinem gotshaus ze Chremsmunster disen offen prief zu einem u^erchund mit hern Dietreichs von Volchenstorf und Dietreich Pauzels an hangunden insigeln pestetigten, wand ich aigens insigels nicht en han. Der prief ist geben ze Chremsmunster, do nach Christes gepurt ergangen warn Dreuzehenhundert iar dar nach in dem acht und zwaisgistem iar an sant Philipps tag.

Source Fulltext: OÖUB 5 (Wien 1868) S. 638-639, Nr. XLVII (Anhang)