Ich Herman der Gnausse tun chunt allen den, di disen prief sehent oder horent lesen, daz ich und mein Hausvrowe vrove Gedraut und unser Erben inne haben daz Gůt datz Galprunn an Heiratgu^et von Elbelein des vorsters sun von Gulfinge und von seinen Erben fu^er viertzich phunt phenninge alter wienner munzze mit solicher weschaidenhait, wenne uns der vorgenant Elbel oder sein Erben di hie geschriben phenninge gebent, wenne daz ist in dem Jar, so sol daz vorgenant gůt von uns ledich sein an allen chriege; daz im deu rede stet und unzebrochen fu^erbaz beleibe, des gibe ich im disen prief und westetige den mit Hern Chunrad des Slegels ynsigel des vogtes ze wels. Dirre sach sind Getzeuge her Hertneide von Traun, her ulreich der Rote, Her Heinrich der Stainpech, Ortolf der Sintzendorfer, Dietel der Gru^enpech, Wernhart von sand veite, Sighart von Gru^ebe und ander erber laut. Der prief ist gegeben, da von Christes geburt ergangen waren Tausent Dreu hundert Jar dar nach in dem Sechtzehen Jar an unser vrowen tage, als si verschiede.

Source Fulltext: OÖUB 5 (Wien 1868) S. 624-625, Nr. XXXIII (Anhang)