Ich Anna die zeit Maistrin in dem Vrownkloster zw sand Jacob zw Newnburg klosterhalben vnd daz Convent gemain daselben verehen - vmb den weingarten genant der Pusenperger gelegen am Mukerawerperig, dez ain Jeuch vnd ain Rahen ist, vnd daz Jeuch ist vreies aigen, so ist der Rahen perchrecht von Jorigen dem Schekchen, dem man alle iar davon dient ain virtail weins vnd ainen helbling ze perchrecht vnd vmb den Emmer weins vnd drey wienner phenning gelts , die man allew iar dient in den egenanten weingarten von einem weingarten dapey, genant der Tullner, den wir chauft haben von hansen dem Gerbestorfer , Kathrein seiner hausfrown vnd von petrein dem holczlein derselben frowen prueder vmb zwai hundert vnd vierczig phvnt wienner phenning, haben wir durch vleissiger pet willen, vnd auch darumb, daz wir daz gelt nicht zw betzaln heten, den egenanten weingarten gegeben dem erbern mann Hainreichen dem flo^eczer, seiner hausfrawn Dorothea vnd ir paider erben vmb zwai hundert vnd vierczig phunt alles wienner phenning - Vnd wann wir nicht aigen insigel haben vnd der egenant Hainreich der flo^eczer der vorgenanten Rahen perigmaister ist vnd mit seinem Insigel sein selbs gwalt nicht besteten mag, darvber so geben wir in den brief - versigilten mit des erbern vnsers lieben herren vnd verbeser insigil, hern Merten dez schenkchen die zeit Chorherr zw Newnburch chlosterhalben, vnd pharrer zw Sand Merten vnd mit der erber zwair mann Insigel Hansen des Plo^edleinss die zeit Statrichter vnd Judenrichter vnd Hannsen des Stengleins - Der brief ist geben - drewzehen hundert Jar, darnach in dem vier vnd newnczigisten Jar an sand Angnesen tag der heiligen Junkchfrawen.

Source Fulltext: ZEIBIG, Klosterneuburg (=FRA II/28, Wien 1868) S. 74-75