Ich Vlreich, Walthers des ZO^echenchess Sun, wand ich zu meinen Jarn wol chomen pin, vergich - das ich - mit meins pergmaister hant, Vlreichs von Rust, die zeit pergmaister des gotshaws vnser frawen ze Newnburgk - gemacht vnd gewidemt hab auf meinen weingarten, des ain virtail ains Jewchs ist, vnd leit in dem kochgraben ze nechst der herren weingarten von Engelhartszelle, do man alle iar von dient vnser frawn gotshaws drew virtail||
weins ze pergrecht, vnd drey helbling ze voitrecht zwai phunt wienner phenning geltes Purkrechtes, die man alle iar dienen sol In der purger zeche datz Sand Mertein an Sand Giligen tag, darumb man ierleich begen schol ainen ewigen iartag meinen vatern walthern, dem zO^echenkess vnd meiner mutter margreten nach der zech gewonhait, als man die pesten iartag daraus beget - Wir haben auch frey wal, die egenanten zwain phunt geltes abzelO^esen, welichs iars wir mugen oder wellen mit Sechczehen phunten wienner phenningen vnd mit zwain phunten phenning derselben mvnzze ze dienst - Vnd wan ich selber nicht aigens Insigels hab, vnd darumb so gib ich fu^er mich vnd fu^er mein erben der obgenanten zeche daz Sand Mertten den brief - versigilten mit des vor genanten pergmaisters Insigel, - vnd mit des Erbern mannes Insigel Chunrats von wienn, purger doselbs ze newnburgk - Der brief ist geben - drewczehen hundert iar, darnach in dem Ains vnd Sybenczigisten Jare an Sand Symonis vnd Sannd Judas tag.

Source Fulltext: ZEIBIG, Klosterneuburg (=FRA II/10, Wien 1857) S. 443-444