Ich swester Ann die Grabnerin ze Minnpach vnd all mein swestern ze Minpach veriehen offenleich an disem brief vnd tu^en chunt allen lewten gegenwurtigen vnd chunftigen oder die den brief lesent order ho^erent lesen daz wir mit wolbedahtem mu^et ze der zeit do wir ez wol getun mochten Reht vnd redleich verchauft haben ainen weingarten gelegen ze Reycherstorf dez ein halbs jeuch weingarten ist vnd leyt an dem chogl vnd haizzt der wechdarn vnd der ze purchreht dient an sand Michelz tag gen Traysemaur vier phennig vnd nit mer den selben vorgenanten weingarten mit aller seiner zu^egeho^erung alz wir in in purchrehtz gwer her praht haben also haben wir in ze chauffen geben dem Erbern hern Chunrat Capplan ze Nuzdorf dacz sand Kathrein vnd allen seinen Erben vmb zehen phunt wyenner phennig der wir gancz vnd gar geriht vnd gewert sein ze rehten ta^egen an all auf schub also daz er hinfu^er allen seinen frum damit geschaffen mag er mag in verseczzen verchauffen niezzen vnd nutzen geben vnd machen wem er wil an all irrung vnd dez sey wir sein rechter scherm vnd gewer fu^er all ansprach . . . vnd daz lub wir allez sta^et ze haben pey vnsern trewn an alz geverd vnd wann ich Egenante Ann die Grabnerin nit aygen Insigel hab so verpint ich mich hinder meiner frawn Ursula der liehten Eggerin die die zeit priorin ist gewesen Insigel alz daz stet ze haben ich vnd ander mein swester daz uor an dem brief stet geschribn. vnd hab auch vleizzig gepetten hern fridreichen den Parschenprunner ze wograim daz er der sach gezeug sei mit seinem anhangunden Insigel im an schaden. Der brief ist gegeben nach Christi gepurt dreuczehen hundert Iar dar nach in dem siben vnd achczigistem Iar an sant Thomans tag dez lieben zwelifpotten.

Source Fulltext: FAIGL, Herzogenburg (Wien 1886) S. 322