Ad noticiam omnium tam presentium quam futurorum transeat per hec scripta, quod ego Hartlibus de Geswente una cum filio meo Hartlibo super infortunitate condicionis enormi euentu in nos veniente per quosdam conuersos domus sancte crucis Cysterciensis ordinis, qui utrumque nostrum exoculauerunt, per interpositionem viri religiosi domini E. venerabilis abbatis in Zwetel cum domino Heinrico venerabile abbate sancte crucis et conuentu suo vniuerso ad concordiam et amiciciam plenam et perpetuam, consentientibus in id ipsum Madela vxore mea et Friderico filio, ceterisque amicis et propinquis nostris peruenimus in hunc modum, quod predicti abbas et fratres sancte crucis tam pro dampno exoculacionis nostre quam pro absolucione curtis in Pirichperch, quam ab eisdem iure ciuili possedimus, dederunt nobis triginta talenta denariorum, et post hec in perpetuum curtis memorata cum omnibus suis appendiciis et usibus absque repeticione quorumlibet heredum et propinquorum domui sancte crucis antedicte in perpetuum remanebit. Promittimus etiam et iuramento confirmamus, quod cum lesoribus nostris, quos reos exoculacionis nostre culpauimus et sciuimus uel sciemus primo et principaliter deinde cum omni congregacione, vniuersisque hominibus sancte crucis ad plenam redimus concordiam et cum ipsis amiciciam tenebimus perpetuo duraturam, ad idem fedus amicicie amicos et propinquos nostros quoslibet toto posse inducere promittentes. Item promittimus et iuramento firmamus, quod nunquam ammodo pernoctabimus nec comorabimus in prediis ecclesie memorate. Item promittimus et iuramento ad hoc nos obligamus, quod, si premissorum quidpiam fuerit irritatum, ex tunc irrequisita super hoc sententia tam res quam personas nostras iudicio deputamus. In huius autem rei testimonium presens scriptum sigillo domini Heinrici marschalci de Weitra petiuimus roborari. Testes autem huius rei sunt, dominus Ebro abbas de Zwetel, frater Hugo cellerarius, frater Alhardus hospitalarius ibidem, frater Ditmarus cellerarius sancte crucis, Otto Poksfůz et frater suus Kadello, Heinricus gener Trostlini, Vlricus de Pernowe, Wernhardus aduocatus, Chunradus Plůmreitter, Ortlo in fouea, Liupoldus in via, Heinricus Chremserius, Heinricus thelonearius, et alii quam plures. Actum et datum anno domini M.°CC.° LXXVII.° in die sanctorum Marci et Marcelliani martyrum.

Source Fulltext: WEIS, Heiligenkreuz (=FRA II/11, 1856) S. 208-209