Notum sit omnibus presentibus et futuris has inspecturis litteras, quia dominus Heinricus abbas sancte crucis de consensu conuentus sui fecit concambium cum domino Hermanno de Wolfkersdorf, dando ei redditus sexaginta denariorum sitos in vlreichschirchen et in Pareinsdorf, quos habebat ab eodem abbate sub iure ciuili Vlricus cognomine Blanch triginta denarios daturus tempore vite sue, post mortem autem suam predictum numerum in sexaginta denariis integrandum. Predictus uero dominus Hermannus de Wolfkersdorf vice eiusdem concambii de consensu conparis sue domine Berthe et filii sui Ottachori contulit predicto abbati et conuentui sancte crucis sexaginta denariorum redditus de quadam curte patrimonii sui sita in Pareinsdorf, que in proximo festo sancti Michaelis predictos sexaginta denarios persoluet, et sic annis singulis in posterum persoluenda. In huius rei certam euidenciam predicti, videlicet dominus abbas de sancta cruce et dominus Hermannus de Wolfkersdorf, presentes litteras sigiliis propriis confirmarunt. Testes sunt, dominus Chonradus de Ebersdorf, dominus Wernhardus de Wolfkersdorf, dominus Marchardus et dominus Chonradus fratres de Pilhiltdorf, dominus Pertholdus de Heiligenperg, Fridericus de Velwen, Vlricus Pirchan et alii quam plures. Acta sunt hec anno domini M.°CC.°LX.°VIII.° in circumcisione domini.

Source Fulltext: WEIS, Heiligenkreuz (=FRA II/11, 1856) S. 166