Ego A. dei gratia Hungarie, Dalmatie, Chroatie, Servie, Rameque rex omnibus speculatoribus et custodibus siluarum tam presentibus quam futuris mossoniensis ac supruniensis castri pacem ac salutem in perpetuum. Cum omnes progenitores nostri domum sancte crucis in Austria dilexerint semper ac fouerint, ego magis illis teneor, et omne, quod utilitati eorum conducit et paci, intendere semper exopto. Hinc est, quod, cum sua nobis conquestione proposuissent tribulationes, quibus eos filii Vlrici de Trutmannesdorf et Vlricus de Wuluelinsdorf affligunt, uobis magis quam illis indignatus sum, quoniam, cum tales coercere deberetis, non solum id non facitis, sed etiam, ut dicitur, res eorum indebite accipientes predium byssenorum maiori ex parte ab eis tulistis fratribus, quibus presidio esse debuistis. Vnde uobis sub obtentu gratie nostre precipimus, quatinus omnes terminos byssenorum ipsis fratribus defendatis, et, si quis de cetero metas eorum tam in siluis quam pascuis sine uoluntate inuadere fratrum presumat, et pecora abigatis et parti eorum uiriliter assistatis. Alioquin, si querimoniam eorum quiescere non feceritis, et meum contemptum et sepedictorum iniuriam fratrum in uos acrius uindicabor.

Source Fulltext: WEIS, Heiligenkreuz (=FRA II/11, 1856) S. 77