Sacrosancta generalis synodus Basiliensis in spiritu sancto legitime congregata universalem ecclesiam representans venerabili . . episcopo Pataviensi salutem et omnipotentis dei benedictionem. Sacre religionis, sub qua dilecti ecclesie filii abbas et conventus monasterii beate Marie virginis in Gotwico ordinis sancti Benedicti tue diocesis promeretur honestas, ut illa eis concedamus, per que sue devotioni liberius intendere valeant illamque per ipsos eo amplius amplecti. Exhibita siquidem nobis nuper pro parte dictorum abbatis et conventus peticio continebat, quod cum olim nativitatis circumcisionis epiphanie resurrectionis et ascensionis domini nostri Jesu Christi ac penthecostes necnon ipsius quarte^a ferie^b immediate illud sequentis^c ac etiam dicte gloriose virginis Marie necnon Iohannis apostoli et ewangeliste, beate Margarethe Laurencii et omnium sanctorum ac etiam ipsius monasterii ecclesie dedicationis, festa Iovis quoque et Veneris sanctos^d et in cena domini ac parasceves dies necnon animarum fidelium commemoratione devote in dicto monasterio celebrari et peragi consueverint, quod monachorum dicti monasterii presencia pro interessendis divinis officiis communiter requiri et haberi solebat et propterea, si omnes et singuli monachi prefati, quorum aliqui pro cura animarum parrochialis ecclesie dicti monasterii exercenda per abbatem et conventum predictos deputantur, divinis officiis huiusmodi interessent parrochiamque eiusdem parrochialis ecclesie pro audiendis divinis officiis ecclesiam dicti monasterii necnon criptam eidem ecclesie contiguam, que pro receptione eorundem parrochianorum sufficiunt, accederent, tam ipsorum monachorum quam parrochianorum et aliorum Christi fidelium illic confluentium devotio quam plurimum adaugeretur. Quare pro parte dictorum abbatis et conventus nobis fuit humiliter supplicatum, ut ipsis, ne aliquem ex monachis predictis ad prefatam parrochialem ecclesiam pro verbo dominico parrochianis ipsis in dictis festis et diebus ac commemoratione faciendo divinaque officia celebrando mittere de cetero sint adstricti prefatique parrochiani et alii Christi fideles, qui causa devotionis inibi confluxerint, ad ecclesiam monasterii necnon criptam huiusmodi in dictis festis diebus et commemoratione accedere divinaque officia necnon divinum verbum audire in eisdem libere et licite possint et valeant, super hoc consulere et oportune providere dignaremur, nos itaque de promissis certam noticiam non habentes supplicationibus huiusmodi in hac parte inclinati circumspectioni tue, de qua in hiis et aliis fiduciam gerimus specialem, per hec scripta committimus et mandamus, quatenus de premissis te informes et si per informationem huiusmodi ita esse inveneris, eisdem abbati et conventui in hiis auctoritate nostra provideas, prout tibi videbitur expedire, non obstantibus quadam prohibitione per certos visitatores a sede apostolica in illis partibus deputatos in contrarium facta ac constitutionibus et ordinationibus ac litteris apostolicis, de quibus et eorum totis tenoribus habenda esset mentio specialis, necnon statutis et consuetudinibus ipsius monasterii de ordinis predictorum etiam iuramento confirmatione apostolica vel quacunque firmitate alia roboratis ceterisque contrariis quibuscunque. Datum Basilee VII. idus iulii anno a nativitate domini millesimo quadringentesimo quadragesimo.

Source Fulltext: FUCHS, Göttweig II (=FRA II/52, Wien 1901) S. 331-332