ICH Ortolf von Volchenstorf und all mein erben verjehen, daz ich ze chauffen han geben Hertneiden dem Winchler oder wem er di schafft oder geit die fumf gueter di mit namen hernach geschriben stent, dez ersten di hueb auf der Stainwant gelegen in Stadelchircher pfarre und daz gu/at auf dem Aygen gelegen in Hoedershofer pfarre und tzway gut auf dem O^edental auch gelegen in Ennser pfarr di alle vierew unser vreis aigen sint, und ain lehen ob dem Prunn da Ulreich der Gelaib (Gelaiss?) aufsitzzt auch gelegen in Enser pfarr und lehen ist von unserm genedigen herren dem bischolf von Pazzaw. Di obgenanten gueter haben wir in geben aus unserm nutz und gewer in ir nutz und gewer mit aller zugehörung umb sybentzikch pfunt wienner pfening der wir gantz und gar gericht und gewert sein. Sew sullen auch di obgenanten güter innhaben nutzen und niezzen mit vollem gewalt. Wir sullen und wellen auch der obgenanter guter ir gewer sein fur all ansprach an aller der stat und in dez not und durfft geschicht. Wer aber daz daz in an der gewerschafft icht abgieng und an alle dew und in dem brief geschriben stet, oder daz in chain chrieg oder irrsal aufstund von der guter wegen, den sullen wir im oder wem er di vorgenanten gueter schafft oder geit allen ausrichten an allen iren schaden. Tun wir dez nicht swaz sew dann dez schaden nement den ir ainer pei sein trewen an aid ungesworn wol gesprechen mag, den selben schaden sullen wir in allen ablegen und gentzleichen widerchern und sullen daz haben und bechomen von aller unsrer hab di wir haben oder noch gewinnen ... Und dez zu einem sichtigen waren urchund gib ich obgenanter Ortolf von Volchenstorf und mein erben in den offen brief versigelten mit meinem anhangunden insigel wolbeslett, und mit meins prueder hern Hainreichs von Volchemtorf chorherre ze Pazzaw und mit meins prueder Jorigen von Volchenstorf und mit meins vetern herrn Seyboltz von Volchenstorf aller dreyer anhangunden insigeln, mit der gunst und willen der chauff geschechen ist, und mit dez erbern herren hern Eherhartz von Chappelln zder zeit hanbtman ze Enns anbangunden insigel. Daz ist geschechen da man zalt von Christi geburd dreutzehenhundert jar und darnach in dem tzway und sybenttziksten jar an sant Veitz tag dez heiligen martrer.

Source Fulltext: OÖUB 8 (Wien 1883) S. 597f., Nr. 595