Ich Lebe hern Otten svn von Grauenberde vnd ich jorg hern Ru^eger svn von Chrems vnd vnser hausvrowen vnd vnser Erben wier veriechen an disem Prief vnd tvn chvnt allen den, die in sehent oder ho^ernt lesen, Daz wier mit wol verdochtem mvet zv der zeit, do wier iz wol getvn mochten, ze Chauffen haben geben recht vnd redlichen dem Erwern herren Apt Engelschalck ze Geleinch vnd seinem Gotzhaus vnsern weingarten in der widen ze Chrems vmb zwai vnd Dreizich phvnt, der wier gar vnd gaentzlichen gewert sein, vnd haben dem vorgenantem herren vnd seinem Gotzhaus den vorgenanten weingarten auf geben ledichlichen zv rechtem Purchrecht mit perchmaister hant dez hofmaister zv der zeit hofmaister in Reichersperger hof, dem man do von geit zehen phenning ze purchrecht an sand Michels tag, vnd schullen auch dez vorgenanten weingarten ir scherm sein fuer alle ansprach, alz landes recht ist in Osterrich; wo wier dez nicht taeten, swelhen schaden dez name daz vorgenant Gotzhaus mit recht, er sei chleiner schade oder grozzer, swie der genant ist, den schulle wier im ablegen vnd schullent daz haben auf vns vnuerscheidenlich vnd auf alle dev, vnd wier haben in dem lande ze Osterrich. vnd dor vber geben wier disen Prief versigelt mit vnsern jnsigeln zv einem vrchvnde diser sach. Der Prief ist geben, do von Christes gepurt worn ergangen Drevzehen Hvndert jar, dor nach in dem Acht vnd zwaintzistem jar an dem Percht tag.

Source Fulltext: OÖUB 5 (Wien 1868) S. 503, Nr. 505