Religiosis ac in Christo venerabilibus et dilectis confratribus et Dominis Engelschalco Abbati, N. Priori totique Conuentui Monasterij Glunicensis Patauiensis Dioecesis Engelbertus Dei Gratia Abbas et Ekhardus Prior totusque Conuentus Ecclesioe Admontensis Salisburgensis Dioecesis cum syncera charitate et affectu Salutem in Filio Virginis gloriosae. Cum secundum Apostolum Charitas sit vinculum perfectionis, quo mediante membra Singula in corpore Sacrae Ecclesiae sibi inuicem coniunguntur et Christo Capiti vniuntur, ad participandam a Christo et in Christo spiritualium influentiam gratiarum, prouide ad participationem huiusmodi salubrius et efficacius capiendam sinum charitatis liberaliter et libenter expandimus et in ampliandae confraternitatis consortium dilatamus Ideoque Religionis et honestatis uestrae fama illecti propensius et attracti Cum plena confraternitate suffragiorum et bonorum consortium in orationibus et elemosynis, quae pro nostris Conuentualibus in Ecclesia nostra fuerint, vobis et uestris confratribus praesentibus et futuris in perpetuum scilicet praesentium testimonio uobis damus adijcientes, quod causa necessaria et rationabili exigente Fratres vestros cum Abbatis sui litteris ad nos missos recipiemus et tenebimus pro tempore oportuno, donec, si emissionis eorum causa talis fuerit, Suo Abbati nostris precibus fuerint reformati, vel ex alia causa qualibet emissi ipsa eadem causa cessante vt (aut) quomodolibet mitigata loco suo et consortio fuerint restituti. Actum et Datum Admont Anno Domini millesimo trecentesimo uicesimo primo in die Scholasticse.

Source Fulltext: OÖUB 5 (Wien 1868) S. 283, Nr. 293