Bertholdus Dei gratia Babenbergensis Episcopus omnibus Christi Fidelibus Salutem in Domino sempiternam. Quomodo, vt ait Apostolus, omnes stabimus ante Tribunal Christi recepturi, prout in corpore gessimus, siue bonum fuit siue malum, oportet nos diem messionis extremae misericordiae operibus praeuenire ac aeternorum intuitu seminare in terris, vt fructu multiplici recolligere valeamus in coelis, Firmam Spem fiduciamque tenentes, quomodo qui parce seminat, parce et metet et qui seminat in benedictionibus, de benedictionibus et metet vitam aeternam. Sane cum nos Monasterium Glunicense a nostris praedecessoribus fundatum fouere merito et honorare debeamus et in quantum poterimus, promouere et cum istum (sic) Monasterium Subsidijs fabricae et aliarum promotionum multum indigeat adiuuari, omnibus Christi Fidelibus, qui deuotionis causa ad dictum Monasterium peruenerint in dedicatione et qui ad opus ipsius manum porrexerint adiutricem, vere poenitentibus et confessis quadraginta dies de iniuncta sibi poenitentia Authoritate nobis a Deo tradita misericorditer relaxamus. Datum apud Attersee Anno Domini millesimo Ducentesimo septuagesimo nono, Kalendas Julij praesentibus perpetuo duraturis.

Source Fulltext: OÖUB 3 (Wien 1862) S. 500-501, Nr. 542