Ich Hertneyd der Chersperiger vnd Ich artolf sein pru^eder vnd vnser paider Erben Wir veriehen offenleich an disem prief alle den, di in lesen, sehen oder horen lesen, Daz wir vnuerschaidenleich mit wol verdachtem muet vnd Gunst vnd gu^etem willen aller vnserr Erben vnd Vreunt vnser gut datz Chopplarn in Syrnicher pfharr gelegen mit allen nutzen vnd mit alle deu, vnd dar zu^e gehort, versuecht vnd vnuersuecht, ze Veld vnd ze dorf, vnd Daz vnser rechtz lehen ist von den Erbern Herren Hern albrecht von Rauchenstain vnd hern Weycharten von Wynchel recht vnd reddleich gesatzt haben Dem beschaidenn mann Maricharten dem Venken vnd seinen Erben vmb Newn pfhunt pfhenning wienner munezz, Der wir in vnd sein Erben weren vnd richten schullen ouf diu Weynachten, diu schierist choment. Wer aber, Daz wir den vorgenanten Maricharten den Venken vnd sein Erben nicht werten nach richten der vorgenanten pfhenning ouf den tag, vnd egenant ist, So schullen siu vns her zu^e Geben nach zwaier pider mann Rat vnd schol ouch hin fu^er daz vorgenant Guet datz Chopplarn Maricharts des Venken vnd seiner Erben recht erchaufftz gu^et sein. Vnd des selben Guets datz Chopplarn sei wir vnd vnser Eriben Maricharts des Venken vnd seiner Erben recht Scherm vnd Gweren vu^er alleu ansprach nach lands recht. Vnd swaz Marichart der Venk oder sein Erben an dem vorgenanten Satz oder an dem Guet datz Chopplarn schaden nement von ansprach mit recht, swie das genant ist, Den selben schaden schullen siu haben auf vns vnd ouf aller vnser hab in dem land. Daz lub wier ze laisten mit vnsern trewen on allez gever. Vnd dar vber, daz diseu wandlung also stet vnd vntzebrochen beleib, Geb wir im vnd seinen Erben disen prief ze einer offenn vrchund versigelten mit mein Hertneyds des Chersperiger jnsigel, vnd wann jch Artolf Chersperiger aygens jnsigels nicht han, verpint jch mich mit meinen trewen vnder meins Vetern jnsigel artolfs des Chersperiger, daz nach meiner pet willen an disen prief gelegt ist. Des sint ouch gezeug Wernhart der Steger, Heinrich der Wurmtaler, pernger von der Hueb. Diser prief ist gegeben nach Christes gepurd Dreutzehen Hundert jar, dar nach in dem Vierzkistem jar des pfhyntztags nach sand Valteyns tag vor vaschang datz Syrnich ouf der widem.

Source Fulltext: OÖUB 6 (Wien 1972) S. 319f., Nr. 314