Quicquid super arduis agitur negociis, tam provida circumspectione decens est procurari, ne de hoc quis in posterum valeat hesitare. Unde ego Hertnidus de Betto/vwe tenore presencium patere cupio universis, quod ad instanciam dilectissimi domini mei Eberhardi venerabilis Salzburgensis ecclesie archiepiscopi omnes possessiones proprietatis, quas in Longo/vwe tam infeudatas quam non infeudatas habebam, cum ecclesia in Temswich et omnibus eidem proprietati attinentibus cultis et incultis, quesitis et inquirendis, simul et hominibus proprietatis eiusdem, sicut mei progenitores libere possederunt, ecclesie Salzburgensi tradidi pleno iure, porcione fratris mei Friderici, quam antea ab ipso comparaveram, adunata, promittens eciam me ab omni impeticione eiusdem fratris mei et omnium coheredum, qua impetita fuerit, defensurum. Promisi quoque, quod filius meus Fridericus matrimonialiter alicui de ministerialibus Salzburgensis ecclesie copuletur ad duos menses, cum a prefato domino archiepiscopo vel suo successore fuerit requisitus. Si vero idem Fridericus superstes non fuerit, quod absit, ad id alter filius meus etate proximus teneatur, que, si non observaverit et adimplere non curaverit, omnia, que iam ab ecclesia feudaliter teneo, sint soluta, dummodo legitimo impedimento non fuerit prepeditus. Abrenunciavi similiter omni iuris impeticioni, quam hactenus in decima in Marchpurch me habere asserebam. Hec autem omnia per me hacta^a) sunt intermissa tali condicione, quod iam prenominatus dominus meus archiepiscopus ex innata sue benignitatis clemencia, consilio pariter et consensu capituli eiusdem ecclesie ac ministerialium accedente, castrum in Wurmberch cum suis pertinenciis, sicut ab ecclesia dominus Swikerus de Holenburch suique progenitores feudaliter possidebant, et villas in Gaeschenich cum vinearum culturis et omni alio iure, quo erant usibus suis applicate, iure michi contulit feudali. Insuper marcas nongentas fini argenti Winnensis^a) ponderis michi dedit pro eisdem de suis officiis in Libenz et Betto/vwe ducentarum viginti quinque marcarum denariorum redditus michi obligando, ita videlicet quod a festo beati Georii venturo proximo per annum eadem michi pecunia persolvatur, et si medio tempore dicta pecunia soluta non fuerit, prescripti redditus cum fructibus, donec solvatur pecunia, meis sint usibus deputati. Recognoscens siquidem collata sincerius beneficia privilegium, quod de filia mea Alheide ecclesie Salzburgensi donata ab imperatoria optinueram maiestate¹⁾, eidem ecclesie assignavi, affirmans eam per hoc cum suis heredibus ecclesie perpetuo conservari, preterea me obligans sub debito iuramenti promisi ecclesie in omnibus necessitatibus fideliter assistere nec non negocia et utilitates suas pro nosse et posse, ubi expedire videro, efficacius promovere. Pro maiori autem huius facti firmitate presentem paginam conscribi volui et sigillis presentibus communiri. Sunt eciam huius rei testes: V/olricus venerabilis Sekowensis ecclesie electus, Otto prepositus Salzburgensis, Fr(idericus) de Libenz eiusdem ecclesie canonicus, Otto de Chunegesperch, Ditmarus de Griuen, Wlfingus de Stubenberch, Wlfingus de Libenz, Gotfridus Cheltzo, Hartungus, Starckandus castellani de Libenz et alii quam plures. Act. aput Libenz, anno domini millesimo ducentesimo quadragesimo sexto, tercio non. octobr., quinte indictionis.||
S.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S.641-642.