[24. Jänner 1586] Anno 1586. Mense Januarii 24. prima est convocata congregatio, in qua dum omnes domini doctores comparuissent, propositae fuerunt:

Primo literae reverendissimi praepositi Viennensis, nec non officialis curiae episcopalis Passauiensis consignatae litera A, quibus petiit judicium medicorum de impotentia cujusdam viri nomine Valentini Mitz non potentis carnale officium conjugi Susannae praestare, an scilicet talis impotentia sit naturalis vel accidentalis, curabilis an non habenda.

Secundo D. Mathei Judicis pro tempore magistri sanitatis literae testimoniales sui doctoratus una cum supplice libello sub litera B., quo petiit admissionem ad collegium, designationem repetitionis puncti et remissionem sumptuum referendorum pro admissione et repetitione.

Ad reverendissimi literas sic domini doctores respondendum concIuserunt. Eo quod partes, inter quas quaestio impotentiae agitata, ad congregationem fuerint convocatae et diligenter examinatae et utriusque partis unanimi confessione impotentia Valentini ad praestandum officium carnale sic contestata et confirmata, ad haec etiam Valentini [fol. 289r] Mitz totus habitus corporis et genitalium externa facies inspectus et quidem illaesus deprehensus, habilis ante contractum matrimonium debitum carnale praestandum mox tamen, eo contracto impotens effectus, ideo hanc impotentiam non esse naturalem sed accidentalem judicavimus.

Secundo etiam dum saepius praenominata impotentia postmodum nec irritamentis aut blanditiis a Susanna potuerit excitari et vigorari quum talis in multos annos duravit et adhuc ea propter et praesertim nunc Valentino consenescente nec ob paupertatem potenti remedia querere, incurabilem impotentiam decreverunt et in hanc sententiam ut exemplum literarum signo C rescribendum injunxerit.

Actrix paupera nihil, reus autem Valentinus Mitz numeravit pro hoc labore 5 flor. 36 cruc.

D. D. Mathei Judicis testimoniales sunt adprobatae, petitio autem remissionis sumptuum, ut inusitata recusata est ea tamen benevolentiae declaratione addita, dato chirographo facultati se auctum fortuna, solvenda soluturum, spatium temporis concessum.

Designatum quoque est ei punctum 25. aphorismus, sectionis 2 partis aphorismorum, intra mensem juxta tenorem statutorum et ab omnibus repetentibus observatum publice ut disputatione prosequeretur, quod ab ipso tamen minime factum, sed inde usque ad tertium hujus decanatus et etiam clarissmi D. D. loannis Aicholz professoris ordinarii decanatum distulit praetensa occupatione, cura aegrorum et infectorum. [fol. 289v]578