[22. April 1508] Decretum Consistorii super assignatas causas277:

Cause allegate per quatuor doctores medicine, scilicet decanum, Marquard, Cuspinianum et Guilhelmum, sunt reiciende, quas etiam reicimus tamquam insufficientes. Ideo demandetur prefatis doctoribus sub pena excommunicationis, quod infra hinc et vigiliam Pasce ante horam undecimam eiusdem vigilie presentent decanum suum domino rectori.278

Vigilia Pasce, septima hora mane, facultas in domo mea congregata super hoc decreto violento et satis capitoso deliberavit in hunc modum:

Facultas considerans assertum rectorem et pretensum suum Consistorium nullas prorsus acceptare rationes neque causas, sed potius vi facti et nullo iuris processu contra facultatem procedere, facultas mota non minarum metu, sed pacis zelo et potissime ob Redemptoris nostri acerbissimam passionem et gloriosissimam suam resurrectionem, quibus hoc sacratissimo tempore pocius, imo longe plus insistendum ac invigilandum fore quam nullis aliis humaniscontentionibus, preterea decrevit, quod decanus rectorem accedat et se nomine facultatis presentet, certa tamen cum protestatione hoc fiat.

Eodem die decanus infra octavam et nonam horam ante meridiem rectorem suis in edibus visitavit, volens exequi facultatis decretum; rector nullam protestationem preter Consistorii consensum acceptare voluit.

Eodem die, prima hora post meridiem, decanus in stuba magna collegii coram rectore et suo Consistorio et certis senioribus universitatis se nomine facultatis presentavit, certis tamen cum protestationibus subannotatis:

Primo protestatur facultas medica, quod sub spe rectificationis et emendationis errorum hactenus in electionibus rectoris et procuratorum commissorum facultas decanum mittat.

Secundo protestatur facultas, quod si dominus rector non provideret de remediis et perpetuis statutis huiusmodi electionem concernentibus, quod velit tunc suum decanum revocare.

Tertio protestatur facultas, quod amore pacis et huius sacri temporis ad precavenda scandala presentet decanum et non aliter.

Quarto protestatur facultas, quod per istam missionem decani sui non velit appellationem interpositam deserere, sed infra terminum iuris, si necesse fuerit, prosequi.

Quinto protestatur facultas, quod ex metu pene excommunicationis de facto et non de iure infligende, qui metus in constantem virum cadit, decanum nunc miserit. [fol. 43v]

Decretum Consistorii super protestatione iam facta279:

Placuit Consistorio, quod articuli protestationis dominorum medicorum quatuor nullo modo recipiantur, quia contrarii sibi ipsis; si autem sciunt commissos aliquos errores, veniant suo tempore ad Consistorium, Consistorium faciet iuxta statuta et privilegia universitatis, et quod iam mox vocetur decanus facultatis medicine et queratur, an sine omni protestatione velit se presentare iuxta decretum pridie datum, bonum; si vero non, tunc Consistorium vult stare in suo decreto et procedere ad ulteriora, et quod ad feriam secundam proxime venturam citentur publice monitorio penali ad comparendum proxima feria quinta ad videndum se declarare incidisse penas excommunicationis vel ad dicendum causam, cur hoc fieri non debeat etc.