[5. Februar 1470] Item 5. die mensis Februarii, hoc est feria secunda in die sancte Agate, hora duodecima, congregata fuit facultas medicine ad deliberandum super articulo unico in cedula transmisso, et articulus fuit ille: Ad audiendum supplicaciones trium magistrorum et in medicina baccalariorum petere volencium, ut domino vicecancellario presententur pro examine ad gradum licencie in eadem. Primus Magister fuit Ulricus Räß de Fisching, secundus Mag. Cristofferus Kreuczer de Wyenna, tercius Mag. Georius Scheublin de Yesingen, qui, statutis prius ipsis lectis, recitaverunt defectus suos, quos audiverunt doctores omnes medicine. Et singula vota fuerunt pro domino Cristoffero, uno dempto. Sed inequalia vota fuerunt, quia seniores admiserunt omnes tres cum dispensacione super defectus eorum, sed juniores fuerunt691 [fol. 73r] eciam in votis eorum discordes, quia duo admiserunt692 Mag. Christofferum et tercius non, sed omnes illi tres doctores juniores fuerunt concordes pro parte negativa aliorum duorum in medicina baccalariorum et steterunt fixi in votis eorum. Et decanus distulit eodem die et non conclusit et voluit se melius deliberare a domino rectore et ab aliis senioribus doctoribus, quid esset facturus, usque ad sequentem diem, et fuerunt doctores iterum vocati ad horam primam.

Item exposui eodem die 27 den. pro vino et panibus.693