Ich V^elreich der Pyelacher und ich Symon der Pyelacher sein prueder vergehen und tu^en chunt allen den di den brief sehent ho^ernt oder lesent, di nu lebent und hernach chumftig sind, daz wi^er an unser selbs stat und an unser dreier pru^eder stat Jansen, Stephans und Pernhartes der Pyelahêr und an aller unsrer erben stat recht und redlich verchouft haben unser vischwaid, di wi^er ze lehen gehabt haben von unserm genedigen herren herzog Albrecht ze O^esterreich etc., di gelegen ist auf der Pyelach und di weilnt in den Pyelachhof und in den hof ze Engelstorf geho^ert hat‚ di nu^er zu dem ainen nachsten gestad gen den selben ho^efen gelegen unser gewesen ist, und stozzt mit dem obern ort an di vischwaid di zu der vest zdem Wasen geho^ert und mit dem nidern ort an des gotzhauses vischwaid datz Sand Po^elten, di weilnt hern Marichartes von Ty^ernstain gewesen ist. Di selben unser vischwaid haben wi^er mit gu^etleichem willen und sunderlich von grozzer geltes schuld wegen dar inne uns Chu^enrat der Pielaher selig unser vater lazzen hat, verchouft und geben mit allen den eren nu^etzen und rechten alz wi^er und der selb unser vater di innegehabt und herpracht haben, umb zwai und dreizzig phunt wienner phenning, der wi^er gar und genzlich verricht und gewert sein, dem erwi^erdigen geistleichen herren hern U^elreich dem Veyrtager probst des goczhaus datz Sand Po^elten, seinem convent da selbes und allen i^ern nachko^emen fu^erbas ledichleich und freileich ze haben und allen i^ern frumen da mit ze schaffen, verchoufen versetzen und geben wem si wellen an allen i^errsal; und sein wi^er der selben vischwaid fu^er uns und fu^er di obgenanten unser pru^eder Jansen Stephan und Pernharten di Pyelacher, di noch zu i^ern jaren nicht cho^emen sind, und fu^er unser aller eriben i^er recht gewern und scherm fu^er alle ansprach, alz lehens recht ist und des landes recht in O^esterreich. Get in fu^erbas dar an icht ab mit recht oder ob si mit recht icht chri^eg oder ansprach dar an gewunnen, von wem das wêr, daz schullen wi^er in alles ausrichten ablegen und auch widercheren an all i^er mu^e und schaden, und schullen si das haben datz uns und auf allen dem gu^et das wi^er haben in dem land ze O^esterreich, wi^er sein lebentig oder tode. Des ze u^erchu^end geben wi^er obgenanten Vlreich und Symon di Pyelacher prueder den bri^ef versigelten mit unsern insigeln, mit des erbern vesten ritter insigel hern Jannsen des Neunhofer und mit Dietreichs insigel des Ma^ewsleins unsers vettern, di wi^er des vleizzichleich gepeten haben, daz si der sache zeugen sind mit i^ern insigeln. Geben datz Sand Po^elten, nach Christi gepu^erd dreuzehen hundert jar darnach in dem a^echt und sechzigistem jar, des mitichen nach sand Mathyas tag dez heiligen zwelfpoten.

Source Fulltext: LAMPEL, Urkunden Sanct Pölten (=FRA II, Wien 1901) S. 14-15