Ich Symon der Merlein^a und ich Gertraut sein hausfrawe und all unser erben wir verjehen offenleichen an dem brief und tün kunt allen den die in sehent oder horent lesen, die nu lebent oder hernach kunftig werdent, das wir mit wolbedachtem müt und mit gütleichen willen aller unser erben und noch unser pesten frewnten ratt und ze der zeit do wir iz wol getun mochten, recht und redleich ze kaufen haben geben unsers rechten aigens unsern hoff der do gelegen ist dacz Teufleinsdorf in Chuliber pharr, do z'den zeiten Wolfel der Hendel auf gesessen ist; darzu hab wir ze kaufen geben drei und vierzig phenning gelts auf purkchrecht ekchern^b di gelegen sind in dem Kirichholcz² und die emoln aus dem vorgenanten hoff genommen sind und die z'den zeiten Dietreich dacz der Pirichen inne gehabt hat, mit alle dew und darzue gehort ze veld ze dorf ze holz ze wismod, versuecht und unversüecht gestift und ungestift, wie so das genant ist oder wo das gelegen ist, und mit allen den rechten und nuczen, als wir iz in rechter aigens gwer wir und unser vodern von alter her pracht haben, also hab wir iz ze kaufen geben Stephan dem Meilawer und frawn Atiligen seiner hausfrawn und ir paider erben, die si miteinander habent oder noch gewinnent, um ains und subenzich phunt wienner phenning, der wir von in ganz und gar verricht und gewert sein an allen schaden. Sew sullen auch mit dem vorgenanten hoff und mit den^c vorgenanten drin und virzich phennige gelts allen iren frum do mit schaffen, mit verseczen und mit verkaufen und geben wem sie wellent mit unserm gütleichen willen an allen irrsal. Wir sein auch des vorgenanten hofs und der vorgenanten drin und virzich phenning gelts ir rechter scherm und gewer für all ansprach, als aigens recht ist und des landes gewonhait in Osterreich. Wer awer daz in an dem vorgenanten hoff und an den vorgenanten drin und vierzig phenning gelts dor an icht abgieng mit recht, welichen schaden si des nemen, den ir ains pei seinen trewn gesprechen mag ungesworen, denselben schaden sull wir in ganz und gar ab tragen und wider cheren und sullen sew das haben auf uns unverschaidnleichen und auf aller der hab die wir haben in dem land ze Osterreich und dovon pechomen an klag und an fürbot und an als recht, wir sein lemptig oder todt. Daz die red furbas stet und unzebrochen peleib, darüber gib ich vorgenanter Symon der Merlein^d in den^e offen brief versigelt mit meinem anhangunden insigel. Der sach ist auch gezeug herr Jorg von Goczeinstorf und Albrecht Leonperger und Hainreich der Leonperger sein prueder und Wernhart der Redler von Öd und Rueprecht der Czendlein^f von Inning mit iren anhangunden insiglen in an schaden. Der brief ist geben noch Kristi gepurd dreuzehenhundert jar darnach in dem ains und sechzigistem jar, an sand Jorgen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 513-514