Wir Wilhelm und Albrecht vettern etc. bechennen, daz wir vnserm getrewn Fridreichen dem Kraften vnd seinen erben vnser ampt zu Gmunden mitsampt dem salczsieden an der Hallstat vnd auch das Yschelland dis gegenwertig newn vnd newnczikste jare nach vnser rete rat zu getrewr hand haben empholhen vnd emphelhen auch wissentlich mit dem brief mit allen eren wirden gülten nuczen diensten zinnsen vnd allen andern zugehörungen vnd gewonheiten, als das ist herkomen vnd als das vnsser vorder amptlewt habent ynngehabt ynnczehaben auzczerichten vnd in allen sachen getreulich zu uerwesen vnd ze uersorgen nach vnsern notturfften zu vnsern handen, als wir im das getrawn. Wir wellen auch denselben Kraften in vnsern sundern gnaden halten vnd mit im oder seinen erben gnediklich raitten, wenn das ze schulden kumpt. Er sol auch alle amptlewt, die zu dem obgenanten vnserm ampt gehörent, seczen vnd entseczen, wie in ye nach seiner trewn dunkt, daz vns des ain notturft sey vnd als das von alter herkomen ist, auzgenomen vnsser hoffschreiber ze Gmunden vnd ze Hallstat, die wir selber gesaczt haben, vnd sol auch ander vnser leut vnd vndertanen darinne getreuleich verantwurten vnd beschirmen vor aller gewalt vnd vnrecht vncz an vns vnd ym auch die vnd all ander stukch getreuleich lassen empholhen sein, als wir im sunderlich daran getrawn. Dauon gepieten wir vesticlich vnsern lieben getrewen allen vnsern amptleuten vndertanen vnd getrewn, die zu vnsern obgenanten ampt ze Gmunden vnd dem Yschelland gehorent vnd den der brief geczaigt wirt, daz si demselben Kraften in den vorgenanten vnd allen andern sachen getreuleich vnd genczleich gehorsam gewertig geraten vnd pei bestendig sein, als vnserm amptman zu vnsern handen an alle widerred vnd geuerd vnd als wir des getrawn. Daran tunt si genczleich vnsern willen. Mit vrchund dicz briefs, geben ze Wienn an Freitag vor dem Palmtag anno etc. LXXXX mo nono.

Source Fulltext: OÖUB 11 (Wien 1983), S. 804-805