Ich Jobst herre ze Abenpergk vnd ich Nes von Schawnberg geborn sein eleich hawsfrawe veriehen vnd bekennen offenleich mit dem brief für vns vnd für all vnser erben vnd nachkomen, das vns der edel vnd wolgeborn herre graf Vlreich grafe zw Schawnberg vnser lieber swager vnd brwder frewntleich gar vnd gentzlich gewert betzalt vnd ausgericht hat alles vnsers heyratguts vnd vertigung, alls vns vnser lieber sweher vnd vater graf Heinreich von Schawnberg der ellter säliger vnd sein sun graf Heinreich von Schawnberg der jünger vnser lieber swager vnd brweder saliger versprochen vnd gehaissen vnd gemaint habent, alls wir des ir brief mit ir baider jnsigeln haben vnd darvmb die zway slos Pewrbach vnd das Irlach vnser pfantschaft ist gewesen mit aller irer zwgehörung, das wir dem egenanten vnserm swager vnd brwder graf Vlreichen grafen zw Schawnberg seiner hawsfrawn vnd iren erben wissentleich vnd ledichleich vber geben haben vnd haben vns des gar vnd gancz verczigen, doch mit sollchem geding, das wir da mit vnserm liben swager vnd brwder graf Vlreich von Schawnberg vnd frawn Ellspeten grefinn zw Schawnberg seiner gemaheln vnsrer lieben swesster alles ir heyratgut vnd heimstewr vnd vertigung auch alles gentzlich ausgericht vnd gewert haben, vnd vertzeihen vns auch aller erbschaft vodrung vnd zwsprüch gentzlich vnd wissentlich mit dem brief hintz der grafschaft zw Schawnberg vnd aller irer zwgehorung in all der mass, alls sich vor ander vnser swester vertzigen habent, allso das wir hintz dem egenanten vnserm lieben swager vnd brweder graf Vlreichen vnd hintz seiner hawsfrawn vnserr liben swester vnd hintz iren erben süne oder töchtern grafen vnd grefinn zw Schawnberg vnd hintz irer egenanten grafschaft kein vodrung oder zwspruch von erbschaft oder dheiner andern sach wegen nicht enhaben söllen oder wellen weder mit recht oder an recht in dhainer weis, awsgenomen, ob vns der tod icht gab, das vnser lieber swager vnd brwder graf Vlreich vnd sein leibleich erben grafen oder grefinn zw Schawnberg vor vnser mit dem tod abgingen, das Got alles bewar, was wir denn mit sambt andern vnsern swestern vnd iren erben rechtlich erben sollen, das sollen vnd wellen wir vnd vnser erben mit in nach landes rechten ob der Enns erben. Auch bekenn ich Johannes herre ze Abenspergk mit sambt meinem sun Jobsten herren ze Abensperg für vnser hawsfrawn vnd für all vnser erben vmb alle die brief, die wir vmb heyratgut oder vmb erbschaft in vnsrer gewallt haben vber die grafschaft Schawnberg oder andrew slos irer zwgehorung, wie die genant sein, die mit teydingen von den von Rosenberkch von den Lantgrafen von graf Heinreichen von Schawnberg vnserm sweher säligem umb das Newhaws oder vmb Stawff vnd die gantzen grafschaft Schawnberg in vnser gewallt komen sind, vnd die brief, die wir darvber haben vnd von vnsern genedigen herren von Östereich haben geworben, die sollen wir alltzemall vnserm lieben aydem vnd swager graf Vlreichen grafen zw Schawnberg seiner hawsfrawn vnd iren erben gantzlich all vbergeben vnd sollen die zw kainem vnserm frwmen wider si vnd ir erben in vnsrer gewallt nicht behallten vnd wo die brief fürbas jndert wider sie vnd ir eriben vor fürsten herren ritter oder knechten auf tägen oder auf rechten fürkämen, da sollen si wider den brief ab vnd tod sein vnd kain krafft nicht enhaben. Des allez zwe vrkund gib ich egenanter Jobst herre zw Abensperg den brief mit meinem anhangendem insigel besigellt vnd zw einer merern zewgnuss aller obgeschriben sach mit des edeln meins lieben vater hern Johannsen herren zw Abensperch auch anhangendem insigel, vnder die obgenantten insigel ich mich auch Nes frawe zw Abensperg von Schawnberg geborn mit meinen trewn verpinde alles das stät zw hallten, das der brief lawtt vnd sagt, wann ich selb begrabens insigels nicht enhan. Der brief ist geben ze Schawnberg an Erichtag vor sand Nyclastag nach Christi geburtt drewtzehen hundert jar vnd dar nach indem sechsten vnd newntzigistem jare.

Source Fulltext: OÖUB 11 (Wien 1983), S. 562-563