Wir Johanns von Gots gnaden pfallenczgraf bei Rein vnd herczog in Beyern etc. bechennen, daz wir durch lieb vnd freuntschaft willen, so wir zu den hochgeborenen fürsten vnsern liben oheimen herczog Albrechten vnd herczog Wilhalmen geuettern herczogen zu Österreich ze Steyern ze Kernden vnd ze Krain grauen ze Tyrol etc. pillich haben, allen chaufläwten, von wann sy auz iren lannden steten märgten oder gebieten sind, wy dy genanntt oder gehaizzen sind, vnser sicherhait vnd gelait gegeben haben vnd geben yn dy auch wissentlich mit dem brief, mit iren leiben chawfmanscheften vnd hab durch allew vnsrew lannd vnd gebiet sicher vnd an beswerung ze varn vnd ze arbaiten, wenn vnd wohin sy wellen, in gutem frid vnd scherm an menichlichs irrung von dem hewtigen tag, alz der brief geben ist, über zehen ganczew jar, dy nacheinander schirst komend, doch alzo daz sy dy gewondlich strazz auf lannd vnd auf wasser varen vnd arbaiten, alz daz von altter vncz herkomen ist an geuer. Dauon enphelhen wir vnsern getrewn lieben hawbtmannen lannduögten grauen freyen herren rittern vnd chnechten, pflegern burkgrauen burgermaistern schultheissen richtern mauttnern vnd zölnern vnd andern vnsern ambtlewten vndertanen vnd getrewn aller vnsrer lannd herrscheften vnd gebieten, daz ir dy obgenanten chaufläwt bei der vorgeschribenn vnsrer sicherhait beleiben lasst vnd dawider nicht tut noch gestattet ze tun in dhain weis sunder daz ir sy, wann sy zu komen, sicher belaitt, wo vnd wy offt yn dez durft geschieht vnd sy dez an ew begern, wann wir daz ernstlich mainen. Mit vrchund dez briefs, der geben ist zu Linncz an Mitichen nach dem Suntag, alz man singet in der heiligen chirchen Cantate, do man zalt von Christi gepurd drewczehenhundert jar vnd darnach in dem viervndnewnczigistem jare.

Source Fulltext: OÖUB 11 (Wien 1983), S. 285-286