Wir der richter rat und die burger gemaindleich ze Steyr bechennen mit dem offenn brief vor allen lawten gegenwürtigen vnd künftigen, das wir ze rechtem erbrecht ze kawffenn haben geben Vlreichen dem Herranter seiner hawsfrawn vnd seinen erben die mül vnderm Spital an der Steyr, die desselben vnsers Spitals ze Steyr ist, dieselb mül wir in cze kawffen haben geben vmb sibenczehen phunt wienner phenning, der wir zu rechten tägen zu vnsers spitalmaister diezeit During des Luger handen genczleich gericht vnd bezalt sein, also beschaidenlich, das derselb Vlreich der Herranter sein hawsfraw vnd sein erben vnd nachkomen oder wer die sind, die dy egenanten mul furbas inne habend vnd besiczend, all wochen am Sampstag raihen vnd geben sullen näwn phenning wienner münnss zu der mess, die man ewikleich alltag in dem selben Spital spricht. Wär aber, das sew dieselben näwn phenning wöchenleich nicht awsrichteten vnd gäben, als vor begriffen ist, und denselben dienst vier wochen versässen, so sind sew dem obgenanten .Spital als oft veruallen sechezik wienner phenning ze wandel an all gnad. Sew süllen auch vollen gewalt haben, ire recht auf der obgenanten mül ze verkümern mit verseczen vnd mit verkawffen, dem vorgenanten Spital an seiner vodrung vnd rechten an schaden. Vnd als oft ain wandlung auf derselben mül geschiht, die sol geschehen mit ains igleichen spitalmaister handen, wer ye ze den zeiten vnser spitalmaister ist, vnd sullen geben der dann abfert sechs phenning ze abfert vnd der dann anfert sechs phenning ze anlait vnd nichts mer. Vnd des ze vrchund geben wir dem obgenanten Vlreich dem Herranter seiner hawsfrawn vnd seinen erben vnd nachkomen den brief besigelten mit vnser statt ze Steyr anhangunden insigel, geben nach Kristi gepurd drewczehen hundert jar darnach in dem zway vnd newnczigisten jar an dem nachten Phincztag vor dem heiligen Aufferttag.

Source Fulltext: OÖUB 11 (Wien 1983), S. 96-97