Wir Albrecht etc. bekenn für vns vnd all vnser erben, daz wir vnserm getrewn lieben Wolfgangen dem Rorer vnd allen seinen erben an den czwain tausent vnd fumfhundert phunden phenningen, darumb sy vns irn tail vnd alle ire recht, die sy haben gehabt czu vnd an der vestten Leonstain vnd irer zugehörung, vns verkaufft haben nach lautt der brief, die wir von jn darüber haben, noch schuldig beleiben zway tausent phunt wienner phenning, dafür wir jn in rechtem werden phands weis versatzt haben zwayhundert phunt wienner phenning jerleicher gült auf vnser mautt ze Stain, die jn ain yegleicher vnser mautter daselbs, der yecz da ist oder kumftichleich da wirdt, alle jar von vnsern wegen raichen vnd geben sol an abslag der nütz zu den vier Quatembern in dem jar, all Quatember fumfczig phunt vnd sol mit der ersten werung anheben zu der Quatember in der Vastten schierist kumftig an verziehen, als lang vncz daz wir oder vnser erben denselben sacz von jn genczleich haben wider gelöst, auch vmb czway tausent phunt Wienner phenning. Wan auch wir sy nach dem gegenwürttigen czway vnd newntzigistem jar mit der obgenanten summ gelts ermanen, so sullen sy vns der losung stat tun an widerred vnd an alles vercziehen. Vnd des ze vrkund geben wir jn den brief versigelten mit vnserm anhangundem jnsigel, der geben ist ze Wienn an Suntag vor Vasnacht anno etc. M°CCCLXXXXII°.

Source Fulltext: OÖUB 11 (Wien 1983), S. 76-77