Wir Graf Hainreich zw Schawnberch veriehen vnd tu^en chunt fu^er vns vnd alle vnser Erben offenleich mit dem brief allen den, di in sehent, horent oder lesent, daz fu^er vns chomen sind die erbern Geistleichen der Probst vnd der Conuent dez Gotzhausez ze dem Slegel vnd habent vns ermanet mit vrchunden vnd briefen der genaden vnd freyung, die in von vnsern vordern ze Aschach auf vnsrer Mautt gegeben sind vmb sunder beda^echtnuzz vnd jarta^eg, die si fu^er vnser vordern vnd ir nachkomen sel vnd hail jarleich in irm Gotzhaus begen vnd haben sullen. nu mainen wir die genad vnd selgera^et, die vnser vordern dem vorgenanten Gotzhaws geben haben, nicht ab ze nemen, Sunder wir wellen vnsrer vordern, vnser vnd vnsrer Erben sel hail, vnd billeich ist, meren vnd bedenkchen vnd haben dem egenanten dem Probst vnd Conuent ze dem Slegel vnd iren nachkomen ir genad vnd freyung fu^er vns vnd vnser Erben besta^ett vnd vernewet Mit der beschaiden, waz man in traid oder wein her auf zu irm Gotzhaus furet, daz si von iegleicher Scheffart nicht mer denn zwelif pfening ze recht vnd nicht mer ze Mautt noch fu^er all sach geben sullen angeua^erd also, daz si vnser vnd vnsers gesla^echtez jarleich beda^echtnu^ezz haben am montag nach Mitter vasten mit vigili vnd selmezzen, als ob wir selb vnser begrebnu^ezz in irem Gotzhaus hieten. wa^er aber, daz si di selben gedachtnu^ezz nicht begiengen, alz uor beschaiden ist, so habent si die egenanten freyung mit der sawmung verworicht vnd stet an vnsern genaden, waz wir in darnach an der egenanten freyung lazzen. vnd der zu vrchund Geben wir in den brief versigelten mit vnserm grozzem anhangundem jnsigel, der geben ist zw Schawnberch am Pfintztag nach sand Andreas tag, do man zalt von Kristi geburd dreutzehen hundert jar vnd in dem siben vnd sibentzigisten jar.

Source Fulltext: OÖUB 9 (Wien 1906), S. 362-363