Wir Albrecht etc. veriehen, bekennen vnd tu^on chunt offenlich mit disem brief, Wan die hochgebornen fursten vnser lieben oheime herczog Ott, herczog Stephan, herczog Friderich vnd herczog Johans gepru^eder des vorgenanten herczog Otten vettern, alle Phallenczgrafen bei Reyn vnd herczogen in Bayrn vns verhaissen vnd gelobt habent, daz si sich vmb graf hainrichen von Schawnberg nicht annemen noch den beschutten noch verantwurtten sullen, von der sachen, ansprache vnd sto^effe wegen, die wir mit im haben, Daz wir den egenanten vnsern O^eheimen verhaissen vnd gelobt haben, verhaissen vnd geloben auch, Jn, ze geben Acht tausent guldein gu^eter vnd ga^eber an gold vnd an gewigt auf den nechsten ku^onftigen sand Jo^ergen tag Vnd auch dieselben guldein ze antwurten vnd richten ze Pazzaw oder ze Saltzburg, an welher derselben Stete ainer, wir wellen, an allez vercziehen vngeuerlich. Vnd darumb zu mererr sicherhait¹⁾ haben wir den vorgenanten vnsern O^eheimen von Payrn . zusampt vns vnuerschaidenlich zu Purgen geseczt vnd seczen auch²⁾ den Hochgebornen vnsern lieben Sweher Purggrafen Friderichen von nu^eremberg, vnd die edeln vnser getrewen lieben V/elreichen von Liechtenstain, hainrichen von walsse yeczunt vnsern hauptman ob der Ens, hansen von Liechtenstain vnsern hofmaister, Wernharten den Drugseczen vnd hansen den Mewrlein. Mit solichem gedinge, were, daz wir vnsern vorgenanten O^eheimen von Payrn die egenanten achttausent guldein nicht richteten auf den nechsten sand Jörgen tag, als vor geschriben stet, Wenne Si denne, vnder augen, oder mit iren gewissen boten oder briefen, dieselben vnser Purgeln ze haus³⁾ darumb manent, So sullent darnach inner ainem Maned⁴⁾ der egenant vnser lieber Sweher der Purggraf von nu7eremberg selb ander erbern mit vier pherden vnd die andern purgeln yeklicher selb ander mit zwain pherden inuaren⁵⁾ ze Pazzaw in⁶⁾ offene Gastha^euser, da man in hinczaigt, vnd da inne ligen vnd laisten, als inne ligens vnd laistens Recht ist, vnd auch von der Laistung⁷⁾ an iren willen nicht komen als lang, vncz das egenant gelt genczlich verricht vnd gewert wirt. Geschehe aber, daz die egenanten Purgeln, vber das, so si also⁸⁾ gemant wurden, nicht laisteten, Swas denn die vorgenanten vnser O^eheme des schaden nemen, der redlich vnd gewonlich wer vngeuerlich, Den sullen wir Jn⁹⁾ mitsampt dem hauptgu^ote genczlich ablegen vnd widercheren . Vnd sullent Si das haben auf vns vnd allem dem vnsern an geuerde¹⁰⁾ . Vnd des zu vrchund vnd geczeugnusse, So geben wir Jn disen brief Besigelten mit vnserm vnd auch mit der vorgenanten Purgeln aller aller anhangenden Jnsigeln. Der geben ist zu Pazzaw an Mitichen vor sant Gilgen tag Nach Kristes geburt etc. MCCCLXXVI.

Source Fulltext: OÖUB 9 (Wien 1906), S. 140-141