ICH Andre der Cherner purger ze Wienne vergich, daz ich mit meiner erben gütem willen und mit handen hern Lucas dez Popphinger zu den zeiten purgermaister und dez rotes gemain der stat ze Wienne verchawfft und geben han mein haws ledigs und vreys an allen dienst daz mir mein hausvrow vrow Kathrei hern Paldweins tochter dez Vierdungs selig ledichleichen mit andern gu^etern geschafft hat zu der zeit do si es ze recht wol getun mocht als der gescheftbrief sagt den si mir darumb geben hat, und leit auch daz vorgenant haws an dem Graben ze Wienne und sto^ezzet mit aynem tail an hern Jansen haws dez Urbetschen die weiln baidew ayn haws gewesen sint, und mit dem andern tail gegen Chunrats haws von Meichssen uber daz weiln Jansen dez Ekstains dez mawrer gewesen ist, mit allen den nuczen und rechten als ich dasselb mein haws unversprochenleichen in purchrechts gewer herpracht han und alz es auch mit alter herchomen ist, umb fumfthalb hundert phunt wienner phennig der ich gar und genczleichen ver¬riecht und gewert bin, den erbern herren hern Hertneyden dem eltern von Pettaw und hern Hertneyden dem jungern von Pettaw seinem vettern marschalich in Steyr und ir baider erben. Und daz diser chawf furbaz also stet und unzerbrochen beleib, darumb so gib ich obgenanter Andre der Cherner fur mich und fur mein erben den egenanten herren hern Hertneyden dem eltern von Pettaw und hern Hertneyden dem jungern von Pettaw seinem vettern disen brief ze einem warn sichtigen urkund und ze einer ewigen vestnunge diser sache versigilten mit meinem insigil und mit der stat grunt insigil ze Wienne und mit dez vesten ritter insigil hern Andre dez Hawser und mit meines swagers insigil Michels dez Vierdungs purger ze Wienne. Der brief ist geben ze Wienne nach Christes geburd drewczehen hundert jar darnach in dem sechs und sechtzgisten jar dez nechsten sampstags nach dem heyligen auffart tage.

Source Fulltext: OÖUB 8 (Wien 1883), S. 278f., Nr. 282