Wir Rudolf etc. tu^en kunt, daz wir vnserm getrewen lieben Eberharten von Chapell schuldig sin vnd gelten sullen fumfzehen hundert phunt wienner phenning die er vns ze vnsern notdurften berait gelihen hat, vnd slahen wir ym dieselben phenning vf vnser behusung ze Ens di er in phandes weise von vns inne hat also, daz er vnd sein erben dieselben behusung alain mit der pu^erghu^et vnd den nuczen vnd rechten die sie vormals darauffe habnt vnd die yn weilent vnser lieber her vnd vatter selig herczog Albrecht von O^esterreich dar zu^o beschikchet vnd geseczet hat, alz lang innehaben vnd niezzen sullen in phandes weise ane abslag der nucze, vncz daz wir oder vnser pruder oder vnser erben die von ynn mit den egenanten fumfzehen hundert phunden phenning, die vns der vorgenant von Chapell ieczunt gelihen hat vnd ouch mit als vil geltes als si vormals von des obgenanten vnssers vatter wegen nach sage siner versigelten briefe darauffe habent, erledigen vnd erlo^esten. Ouch sullen derselb von Chapel vnd sein erben vns vnd vnsern prudern vnd vnsern erben der selben losung stat tu^on vnd gehorsam sein, wenne wir wellen vnd ez an sei vordern, vnd sullen vns ouch mit der veste ze Ens vnd swas dar zu^o geho^ert wartein vnd gehorsam sein, vns vnd die vnsirn darin vnd daravs ze lazzen vnd da inne ze enthalthen ane irn merklichen schaden wider aller menklich niemt auzgenomen, wan vnd wie o^eft vns des not geschicht ane allez geuer. Mit vrkunt Datum feria secunda post Jacobi, anno l. nono.

Quelle Volltext: OÖUB 7 (Wien 1876), S. 653, Nr. 643