Wir Albrecht etc. veriehen vnd tun chunt offenleich vmb die m. t. (1000 ß) wienner pfenning, die vnser getrewer liber Eberhart von Chappell von vns gehabt hat vf dem sacz ze Peylstain vnd die er vns berait gelihen hat, vnd vmb di dccc vnd lxxxxvj guter guldein vnd c. t. (100 ß) wienner pfenning, die wir im schuldig sein beliben vmb seinen dienst den er vns tet wider die von Zurich mit xvj. helmen vnd mit xvj schutzen, daz wir im fur dasselb gelt allez empholhen haben vnd emphelhen och vnser behawsung ze Ens mit zwein hundert pfunten ierlicher gult, der wir im anderthalb hundert pfunt schaffen auf vnser mautt vnd vf vnser gericht in der stat daselbst ze Ens, vnd funfczig pfunt geuallent im von dem vrbar vnd von dem lantgericht, ouch sullen wir oder vnser erben den egnanten von Chappell vnd sein erben da nicht enthousen, e si des egnanten irs gelts allez verricht vnd gewert sein. vnd ob derselb von Chappell an leiberben abgieng, so sol Vlrich sein bruder vnd sein erben di behousung vnd die vorgenant gult innhaben ze gleicher weis als da oben geschriben stet. Wa^er aber daz in desselben irs gelts not beschech, wen si vns den an ir stat antwurtent vnd fu^er bringent der zu vns vnd vnserm land geho^ert, den mugen si wol mit vnserm willen auf die vorgenante behawsung vnd di egnanten gult weisen fu^er ir egnant gelt also, daz der den si mit vnserm willen dar auf weisent, die behowsung vnd gult innhab in aller mazz als da vor an disem brief begriffen ist. Des geben wir ze vrchund etc. Datum Gretz in vigilia sancti Laurentij anno domini mccclvj°.

Quelle Volltext: OÖUB 7 (Wien 1876), S. 471f., Nr. 464