ICH Dietreich von Hohenberch vnd ich Elzpet sein hausurowe vnd ich Hadmar der Jung Stuchsse vnd ich Offmey sein hausurowe veriehen vnd tu^en chunt allen den, die disen brief lesent oder ho^erent lesen, die nv lebent vnd hernach chunftich sind, Daz wir mit aller vnser erben guten willen vnd gunst, mit verdachtem mu^et vnd mit gesampter hant vnd nach vnser pesten freunde Rat vnd nach anderr Erberr Herren Rat zv der zeit, do wir iz wol getu^en mochten, vns liebleichen vnd gu^etleichen verebent vnd verrichtet haben mit vnserm Swager Reinprechten von Pilichdorf vnd mit seiner Pasen vron Katreyn hern Jansen witibe von Haslawe, dem Got genad, vnd mit irn erben Vmb allen den Chrieg vnd vmb alle die ansprach, die wir gegen ein ander gehabt haben vmb daz Dorff ze Aurolfstal vnd vmb alles daz, daz dar zv geho^eret, Ez sei Aigen oder Lehen, in vrbar ze holtz, ze Velde vnd ze Dorff, ez sei gestift oder vngestift, versu^echt oder vnuersu^echt, swie so daz genant, Also beschaidenleichen mit auz genomner rede, Swaz dez vorgenanten gu^etes ze Aurolfstal aigen ist. daz sol Reinprecht von Pilichdorf vnd sein Pase vro Katrey hern Jansen witib von Haslawe vnd ir Erben zwai Tail ledichleichen haben an allen Chriege, damit furbaz allen irn frumen ze schaffen, alz ez in wol chum vnd fu^ege an alle irrung, vnd daz Drittail des egenanten gu^etes, daz aygen ist, daz Su^eln wir vnd vnser Erben auch ledichleichen haben an alle wider rede, damit furbaz auch allen vnsern frumen ze schaffen, alz vns daz aller peste wol chum vnd fu^ege an allen irrsal. Vnd swaz des oftgenanten gu^etes ze Aurolfstal Lehen ist, swie so daz genant ist, daz sol der vorgenant Reinprecht von Pilichdorf ledichleichen vor auz haben an allen Chriege vnd an alle wider Rede. Vnd daz disev sach vnd disev Ebnunge furbaz zwischen vns also staet vnd vntzerbrochen beleibe, Dar vmb so geben wir ich Dietreich von Hohenberch vnd ich Elzbet sein hausurowe vnd ich Hadmar der junge Stuchsse vnd ich Offmey sein hausurowe Reinprechten von Pilichdorf vnd vron katreyn hern Jansen witiben von Haslawe vnd irn erben disen brief zv einem sichtigen warn vrchund vnd zv einer Ewigen Vestenunge versigilten mit vnsern Insigiln vnd mit hern Hadmars Insigil dez Stuchssen von Trautmanstorf, mein egenanten Hadmars Vater vnd mit hern Stephans Insigil von Hohenberch, mein vorgenanten Dietreichs bru°der, die diser sach gezeug sind mit iren Insigiln. Diser brief ist geben ze wienne nach Christes gebu^ert Drevzehen Hundert iar, dar nach in dem Acht vnd Dreizgisten iar an sand Gregorien tage in der Vasten.

Source Fulltext: OÖUB 6 (Wien 1972), S. 263f., Nr. 260