Ich Pilgreim der Walich vnd mein Hausvrowe vro Sophey veriehen offenbar an disem brief vnd thun chunt allen den, di in lesent, sehent oder ho^erent lesen, di nu lebent oder hernach chunftig sind, daz vns Got von Himel des ermant hat, daz wir vns in vnser gwizzen auzerwelt haben ze ligen nach vnserm tod datz der Edeln Chuniginne Marie in irem Chloster zdem Hohenfurt, vnd darumb hab wir vns des veraint lieblichen vnd gutlichen mit vnser besten vreunt rat vnd auch zder zeit, do wir iz wol getun mochten an siechtung vnd an alle chranchait ze geben dem egenanten chloster zwen Weingarten, di wir haben lang herpracht in rechter purchrechts gwer an allen chrieg. Der ain leit ze Goboltspurch am kyrichegraben im gern, dauon man dient alle Jar an Sand Micheltag ze rechtem perchrecht funph phenning, der ander leit ob Heundorf am Haslech in der Setz, der dient alle Jar an Sand Michelstag ze Perchrecht drithalben Phenninch wienner Mu^enzze. Di schullen di Herren di Sammung des oftgenanten chlosters nach vnserm tod in irem Reuent niezzen, wan wir inz gegeben haben zeinem ewigen selgeret mit vnsers suns fridreichs vnd mit andern vnsern Erben gutlichem willen. Daz in daz stet vnd ewichleichen vnzebrochen beleib, darvber gib ich Pilgreim der Walich disen offen brief mit meinem anhangunden Insigel vnd mit Hern Dietreichs Insigel von Harach vnd mit wolcharts Insigel des Gullen, der zden zeiten Lantrichter was in der vreinstat fur allen chunftigen chrieg. Der red sind zeug Dietrich der walich, Hainrich der Gletner, Vez der Schaffer, Vlreich der Walpot, Elbel vnd sein bruder der dunne, Chunrat der ammolf, Herman der zynernspan, fridreich der wegner vnd ander pidber leut gnuch, di der sach gern Zeug sind. Der brief ist geben nach Christes geburt dreutzehen hundert Jar, dar nach in dem ainz vnd dreizkysten Jar an sand Bartholomeustag in der vreinstot.

Source Fulltext: OÖUB 6 (Wien 1972), S. 32, Nr. 27