Wir Kungund Graffin zw Orttenberig veriechen offenlich an disem brief vnd thun kund allen den, dj in sechent oder horent lessen, Das wir vnd vnser Erben mit gutem willen vnd mit wolbedachtem Muett vns gar vnd ganczlich verzeichen vnd verzigen haben la^ewtt vnd gutt vnd aller der Herschafft, so die vnser lieber Sun graf Hainreich von Orttenburg hatt, versucht vnd vnuersuchtt also, das wir vnd vnser Erben hintz im vnd hintz seiner hawsfrawn vnd jrn Eriben, dj sy miteinander gewinen, kainen krieg noch ansprach haben in kain sachen weder klain noch gross vmb diselben herschafft, als vor geschriben ist. Das das jm vnd seiner hawsfrawn vnd jren Erben also statt vnd vnzeprochen peleib, daruber geben wir disenn brief zw ainem vrkund mit vnserm Insigl versigelt, Der geben ist, do man zalt von Kristi gepu^erd drewzechenhundertt Jar, darnach in dem ains vnd zwaintzigistem Jaren des negsten Suntags Nach dem auffarttag.

Source Fulltext: OÖUB 5 (Wien 1868), S. 294, Nr. 303