Wu^er Graf Perchtold vnd Graf Purkart die zween Bru^eder von Maidtburg veriechen vnd thuen khundt allen den, die disen brief ansehent oder ho^erent lesen, die nu seindt oder künfftig werden, das ain krieg gewesen ist zwischen vns an ainem thaill vnd zwischen vnsern gethreuen Shwagern herrn Wernharten vnd herrn Cunraden den zwaien bruedern herrn Heinrichs Sun des Jungern von Schaunberg an dem andern thaill vmb den thaill, den die Erber frau Gra^efin Wilburk vnser liebe Muemb, der gott gnadt, an dem haus zu Hardekh vnd an allem dem, daz darzue geho^ert, leuth vnd guett, vnd wie es benanth ist, den Sy jn nuz vnd gewehr gehabt hat vnd Sye vns gegeben hat ze der zeit, do Sye es wol gethuen mocht, den wu^er auch in nuz vnd gewehr gehabt haben vnnd noch haben, vnd auch vmb den thaill, den die von Schaunberg von alter hergebracht haben vnd noch habent an dem ehe genanthen Geshlos vnd an allem dem, das vor zuegeho^ert, leuth vnd guett vnd wie es benant ist; die zway thaill hab wu^er mit verdachtem Mueth gar vnd genzlich gesazet an vnsern gethreuen Ohaim Vlrichen von Meissaue also, das Er vns darumb vnnd mit thuen haist, daz wu^er Ihm des gehorsam sein vnd geloben Ihm das statt zu halten mit vnsern treyen an Aidestatt vnd an alle arglist. Die Verrichtung soll geschehen sein ze Sunbendten. Nu hab wu^er durch gunst vnd durch freuntlich bett dieselben Verichtumbe gelengert auf sanct Giligetag ku^enfftig vnd wen vns graf Vlrich von Schaunberg darzue vodert in der zeit, des sullen wu^er jn beraith vnd gehorsam sein vnd soll auch vnser ieglicher an nuz vnd an Gewo^ehr beleiben an dem thaill, den Er vnz her hat bracht, vnczt das Vlrich von Meise (sic) daru^eber spricht, daz Er daru^eber sprechen will, vnnd was Er daru^eber spricht, das gelobe wu^er Im Sta^ett vnd unzebrochen ze beleiben. Daru^eber geb wu^er Ihm diesen brief zu ainer Vrkhundt diser sachen versigelt mit vnserm Insigl. Diser brief ist geben zu Krumau nach Christi geburdt dreyzehen hundert Jahr vnd in dem Sibenzehenten Jahr des negsten Suntags vor St. Laurenzen tag im Summer.

Source Fulltext: OÖUB 5 (Wien 1868), S. 198-199, Nr. 199