Ich Ortlieb von winchel vergich vnd tv^en chvnt allen den, die disen Prief lesent oder Ho^erent lesen, die nv lebent oder hernach chvnftich werdent, Daz jch mit verdachtem Mv^et vnd mit Rat Meiner vrevnt vnd mit gesamenter Hant ze den Zeiten, da ich ez wol getv^en mo^echtt, Ledichleich gemachet vnd gegeben han allez daz gv^et, daz ich gechovft han wider Hern Haidenreichen den Pvrgrauen von Go\vrs vnd sein Hovsvrouen vron Gedrouten datz Rapotstal vnd datz Ottental vnd allez daz Gv^et, diaz ich gechovft han wider Hern Chvnraten von werd vnd vron wenteln sein Hovsvrouen Datz Gukking vnd die Mv^el in dem alten werd vnd zwen wêrd, die da haizzent der Pavsche vnd der Hanndorfer, vnd ovch datz Sechsendorf, datz Choleinstorf vnd datz Ryetental vnd ovch daz ich gechovft han wider vron Hailweigen Hern Chadoltes witiben von Ryetental des werder vnd irew° chint datz Rapotstal oberhalb des weges vnd daz ich gechovft han wider vron Katrein hern Gvndachers witiben des werder von Drozz datz Ottental vnd datz Ryetental vnd daz ich gechovft han wider Tyemen Hern weichartes Svn von Ryetental datz Povngarten gelegen vnd daz ich gechovft han wider Otten den zehentern von Rapotstal, Ez sel Aygen, Lechen, Satzvng vberlent, Pfennich Gvlt, weingarten, Echer oder Povngarten, versuecbt vnd vnuersuecht, Gestift oder vngestift, ze veld vnd ze Dorffe Meiner Hovsvrouen vron Elspeten vnd vnser Paider Chinden, die wier mit ein ander Haben oder nach gewinnen vu^erwaz allen iren vrvm da mit ze schafen, versetzzen oder verchovfen vnd ze geben, wem sev wellen, alz ez in aller peste cho^em oder vu^ege, vnd wer ovcb daz getan, daz ich vnd Mein Hovsvroue vroue Elspet on Erben stvrben mit ein ander vnd chaines Erben bechemen, So sol daz vorgenant Gv^et, als jch ez in Osterreich gechovft han wider die egenanten Herren, vrouen Oder Diener, als sew vorgenant sint, Ledichleichen an Erben Hern Bu^ezken Chind von Raetz Schebarn vnd vron Katherein, wan jch daz vorgant (sic) Gv°t, als ez ê benant ist, gechovft han vmb die Margengab, die mier mein Hovsvroue vroue Elspet, der egenanten Chind Schebars vnd vron Katherein Mveter ze Rechter Margengab pracht hat vierdhalb Hvndert March Silbers wienner gewichtes. Daz disev Red also stet vnd vnzeprochen beleib, Dar vber so gib jch vorgenanter Ortlieb von winchl disen Brief Meiner Hovsvrouen vron Elspeten vnd vnsern Erben vnd ovch Schebarn vnd vron Katherein, als vorgeschriben stat, zve einer vrchvnd vnd zv^e einen waren gezevch diser Sache versigelten mit meinem jnsigel. Des sind ovch gezevg mit iren jnsigeln die Herren, die Her nach geschriben stent: Her Rapot der Pvrchgraf von Go^ers , Her Hadmar von winchel, Her Chvnrat von Cheyowe, Her Levtolt von Hokenwerch, Her Ortlieb Hern Hadmars Svn von winchel, Her Reinprecht von Scho^enberch vnd der Tvers von Tyrenstoen vnd ander pider Laevt genv^ech. den die sache wol chvnt ist. Diser Prief ist gegeben, da von Christes Gepverd sind Gewesen Drevtzechn Hvndert jar, Dar nach in dem Sechtzechntem jar an Sand Jacobs Tach des zwelfpoten ze wienn in der Stat. Amen.

Source Fulltext: OÖUB 5 (Wien 1868), S. 171-172, Nr. 172