Ich ludweig der Grans vergich an disem brieff, das mir mein lieb heren Chunig Ott von vngern vad herczog Stephann enpholichen, das ich vnuerzogen recht solt thun hern hylprant dem Techant von Mawrkirchen vnd Symonn von Merntol vber den krieg, den sy hetten vmb dew widm zu widemleiten pej merntol. daru^eber gab ich in ainen tag nach ir paider willen auff vnuerzogenew recht hincz Maurkirchen; do si paid fur mich komen, do daucht Symonn, er gewun nicht vil mit dem rechten vnd liessen is enschied an vier erber man, an dem probst von obernperg, an hainrich von Thalain, an den Thuemair von althaim, an wernhern den widemer von Reizdorf vnd wurden si paid der sach vnwaltig, die beschieden, das Symon vnd sein hawsfraw vnd sein kindt sich uerzeihen solten des selben gucz dacz widemleiten vnd solten sten von aller der ansprach vnd van all dem Krieg, den si vor heften gehabt auff das selbig gut, vnd dass der techandt Symon solt lassen funff iar von den nächsten weinachten das selb gut an stewr, wann in dem ersten iar geit er zehen pfening ze Stewr vnd sols alle fu^enffe gen in sein Stipfft mit zwain huneren vnd vngestewrt haim gen. er sol auch dew jar geben XV. pfenning zu dienst vnd sol dem holcz trewlich zu sehen vnd nicht daraus nemen wan sein notdarfft beschaidenlich, vber vert er der chains, so uerlust er des techants gunst vnd dew iar, die er im lassen hat ||
||
als dew funff iar endt haben, so sol der vorgenant techandt oder wer pfarrer zu Maurkirchen ist, das selbig gut stifften ledicklich, mit wem er will an alle ansprach, die Schiedung namen sy paid für gut vnd gie der Symon vnd sein hausfraw vnd seine kindt vnd uerzigen sich des selben guts vnd stunden von all ir krieg willicklich ze meiner gegen (sic), diser Taiding vnd der Schiedung sint zewg die pider lewt, di da pej waren vnd vns hulffen verrichten, her wernher der grans, her fridrich der Sachs von vnwurch, her . . . . . .der wizepech, her Rapot von albreczhaim, wernhart vnd gregorig von Chirchsteig, hilprant, Ch., fridreich di huchohen, fridrich der Epelhawser, Chunradus der Eminger, Ott der pecher, herrant von Salhorn, wernhart von o^ezeinsdorff, wernhart der lanchmair, hainrich der schikk, Ch. vnd dietreich von alberting, hainrich von piburk, herman verrichtinger, ist geschehen noch Crist gepurdt Tausent drewhundert iar, in dem newnten jar an sand Bartholomeus obent.

Source Fulltext: OÖUB 5 (Wien 1868), S. 27-28, Nr. 23