Nos capitulum ecclesie Iauriensis memorie conmendamus, quod religiosus vir dominus frater Iohannes, condam custos de Batha, coram nobis personaliter constitutus confessus est viva voce in hunc modum, quod, quamvis condam dominus frater Martinus, abbas de Bel, quendam fundum curie in suburbio castri novi Pestiensis ex opposito ecclesie Beati Petri martiris in vicinitatibus Petri litterati et domine relicte condam Nicolai Engi dicti habitum sumptibus et pecuniis sue ecclesie, videlicet abbatie sue predicte mediantibus litteris perpetualibus civitatis Budensis pretio emerit, ipsumque fundum curie idem dominus frater Iohannes, condam custos et alter Iohannes de Farkosnynye, per quandam adiudicationem regie maiestatis pro nunc possiderent et alias possedissent, tamen quia prefatus dominus Iohannes, condam custos de predicta Batha, in tali possessionaria conservatione dicti fundi curie, uti dinosscitur, sacrilega, periculum et offensam sue conscientie, considerasset posse et potuisse eveniri, presertim ideo, quia ipse dictus fundus curie non ex aliis, quam realiter ex proventibus dicti monasterii de Beel fuisse emptus verasciter (!) agnovisset et agnossceret, ideo idem frater Iohannes cupiens sibi et anime sue precavere et conscientiam suam non ledere, veram equalem et directam medietatem ipsius fundi, ipsum ad presens ratione previa concernentem pure et simpliciter Deum et iustitiam eius pre oculis habendo domino fratri Michaeli abbati ac conventui de predicta Bel et per consequens ipsorum monasterio remisisset et resignasset, imo remisit et resignavit nostra in presentia harum litterarum nostrarum testimonio et vigore mediante. Datum in dominica Letare, anno Domini millesimo quadringentesimo vigesimo quinto. [1425. márc. 18.]